Русский  >>  فارسی  >>  Шанбе 3 декабр 2016, 00:51

Ҳиҷобдорон боз ҳам мавриди боздошт қарор гирифтанд

9 май 2011, 13:17

Субҳи имрӯз се тан аз занони либоси мусулмонидоштаро, ки аз минтақаи Назди Маскав (Подмоскове) барои тамошои гузашти низомӣ ба Маскав омада будаанд, пулис дар минтақаи метрои Братиславская мавриди боздошт, тафтиш ва таҳқир қарор додаст.

Тибқи иттилои расида, дар ҳоли ҳозир мусулмонони Русия аз зиёд шудани ҳолатҳои таъқиб ва таҳқирашон аз сӯи пулис нигаронӣ мекунанд. Махсусан, дар пойтахти Русия ҳолатҳои беасоси боздошту бозпурсии занони либоси мусулмонидошта баъди ҳаводиси инфиҷории декабри соли 2010 дар метрои Маскав ба чанд маротиб афзойиш ёфтааст.

Бино ба гуфтаи яке аз духтарон, ки худро Ҷаннат муаррифӣ кардааст, пулис бо тафтиши ҳуҷҷатҳои онҳо  ва пайдо накардани ишкол дар ҳуҷҷатҳояшон қаноат накарда, аз чӣ бошад, ки гурӯҳи фавриро даъват карда, онҳоро маҷбуран гӯё барои тафтиши бағочашон ба шӯъбаи пулис бурдаанд. Дар шӯъбаи пулис бошад, аз онҳо «террорист» ном бурда, расмашонро гирифта, бо навбат аз сӯҳбати 10 нафар гузаронида, нақши панҷаҳои дастонашонро гирифтаанд.

Дамира, Ҷамила ва Ҷаннат муддати 2 соат мавриди истинтоқи пулиси Маскав қарор гирифтаанд ва аммо касе бағочи онҳоро тафтиш нанамудааст. Ҳамчунин аз ин 3 нафар маълумотро дар хусуси қайди маҳалли зисташон, дар қайди духтури рӯҳшинос қарор доштан  ва дар қайди дармонгоҳи нашъамандӣ буданашонро ба тариқи хаттӣ тақозо кардаанд.

Бино ба гуфтаи коршиносони масоили ҳуқуқ ироаи ин гуна маълумот ихтиёрӣ буда, касе ҳақ надорад дар ин бора аз шаҳрвандон хаттӣ ва ё умуман ба таври дигар маълумот бипурсад. Ин амали пулиси Маскав миёни намояндагони созмонҳои мусулмонии Русия вокунишро ба бор оварда, ҳамакнун духтарони таҳқиршуда якҷо бо вакили дифоъи ботаҷриба, ки яке аз созмонҳои ҳуқуқҳимоякунанда манзур кардааст, ба додситонӣ аз болои ин амали пулис шикоят бурдаанд.


Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!