Беларус муҳоҷирони корӣ аз Тоҷикистонро қабул мекунад

Боздиди ҳайати Хадамоти муҳоҷирати Тоҷикистон таҳти сарварии сардори ин ниҳоди тозатаъсис, Сафиалло Девонаев аз Беларус ба поён расид.

---

Тибқи иттилои расида, дар шаҳри Минск ҳайати мазкур бо  бо муовини вазири корҳои дохилии ҷумҳурии Беларус – Е.Полуден, сардори департаменти шаҳрвандӣ ва муҳоҷирати ин вазорат А.Бегун  ва дигар шахсони масъул мулоқот кард.  Дар вохӯрӣ масъалаҳои ба роҳ мондани ҳамкориҳои дуҷониба дар соҳаи муҳоҷирати меҳнатӣ ва такмили заминаи шартномавию ҳуқуқии он, ба роҳ мондани муносибатҳо бо кордиҳандагони кишвари иқомат ва ҷалби мақсадноки муҳоҷирон, тайёр кардани мутахассисон, ҷалби муҳоҷирони меҳнатии тоҷикистонӣ ба барномаҳои бахши кишоварзӣ бо истиқомат дар агрошаҳракҳои Беларус ва дигар масъалаҳо муҳокима шуданд. Ҷонибҳо дар рафти вохӯрӣ, аз ҷумла зарурати таҳияи ду лоиҳаи созишномаро дар соҳаи муҳоҷирати меҳнатӣ қайд намуда қарор карданд, ки онҳоро дар мӯҳлати кӯтоҳ таҳия ва мувофиқа намоянд. Дар назар аст, ки ҳуҷҷатҳои зикршуда масъалаҳои ҳифзи ҳуқуқӣ ва иҷтимоии муҳоҷирон, тамдиди мӯҳлати бақайдгирии онҳо, содда кардани тартиби гирифтани ҳуқуқи шаҳрвандӣ ва дигар масъалаҳои муҳимро ба танзим медароранд.

Рӯзи 12 июл дар сафорати Тоҷикистон дар ҷумҳурии Беларус  бо кордиҳандаи кишвари иқомат, муовини директори генералии ширкати сохтмонии “Версо-Монолит”   К.Каримов   мулоқот доир  гардид. Тарафҳо ба хулоса омаданд,ки ҷониби Тоҷикистон ҷиҳати ҷалби коргарон ба иншооти сохтмонӣ (то 300 нафар) кор мебарад. Худи ҳамон рӯз дар сафорат вохӯрии ҳайати Хадамоти муҳоҷирати назди ҳукумати ҷумҳурии Тоҷикистон бо ҳамватанон ва муҳоҷирони меҳнатии кишвари иқомат доир гардид. Дар рафти вохӯрӣ сафири фавқулодда ва мухтори Тоҷикистон дар ҷумҳурии Беларус Қозидавлат Қоимдодов доир ба сиёсати сарвари давлат оид ба муҳоҷирати меҳнатӣ, иқдоми ҳукумати Тоҷикистон ҷиҳати таъсис додани Хадамоти муҳоҷирати назди Ҳукумат ва аҳамияту вазифаҳои сохтори нав, инчунин дар бораи ҳамкории сафорат бо ҳамватанон ва шаҳрвандони тоҷикистонии муқими кишвари иқомат сухан гуфт. Сардори хадамоти муҳоҷирати  Тоҷикистон Сафиалло Девонаев  оид ба ҳадафҳои дар назди хадамот гузоштаи ҳукумат, мақсади ташрифи худ ба Ҷумҳурии Беларус, инчунин натиҷаи гуфтушунид маълумот дод.Иштирокчиёни вохӯрӣ  фаъол гардидани кори ташкилоти ҷамъиятӣ ва аз ҷониби сафорат дастгирӣ шудани фаъолияти онро  таъкид карда, ҳамзамон зарурати касбомӯзӣ ва таҳсили фарзандонашонро дар мактабҳои олии Тоҷикистон ва мактабҳои кишвари иқомат иброз доштанд.{jathumbnail off}

Мӯҳр