Русский  >>  فارسی  >>  Сешанбе 6 декабр 2016, 07:49

Сигоркашии занони тоҷик: Аз ҳавою ҳавас, асабоният ё мушкилот?

30 май 2013, 17:24

Нилуфари КАРИМ

Агар даҳ сол қабл сигоркашии бархе аз занону духтарон дар Тоҷикистон одамонро ба тааҷҷуб меовард, ҳоло ба як ҳолати маъмулӣ табдил ёфтааст.

Мо Надежда Сиярова, як сокини пойтахтро дар яке аз хиёбонҳои шаҳри Душанбе дидем, ки бепарвоёна сигор мекашид. Ӯ дар сӯҳбат бо мо гуфт, ҳудуди се сол аст, ки ба сигоркашӣ рӯ овардаву далелаш ҳам “мушкили оилавӣ ва асабоният” аст.

Надежда нақл кард, ки ҳангоме аз шавҳари худ ҷудо шуду бо як кӯдак танҳо монд, ба сигор рӯ овард ва то кунун пойбандаш аст. “Бештар вақтҳои асабоният ва ҳаяҷони зиёд сигор мекашам ва он бароям эҳсоси оромӣ мебахшад”,-афзуд ӯ. Мусоҳиби мо мегӯяд, сигорҳои ба истилоҳ занона мекашад, ки андоза ва таъми он аз сигорҳои дигар фарқ доранд. Ӯ борҳо талош кардааст, то аз ин одат даст бикашад, “аммо мушкили як зани танҳо ва асабонияту эҳсосоти зиёд маҷбур мекунад, барои оромиш боз ба сигору дуди он рӯ орам”.

Таҳмина Давлатова, мутахассиси пешбари Маркази худшиносии бонувон дар Душанбе, бештар ба дастгирии равонии занон машғул аст. Ӯ мегӯяд, ба маркази онҳо бештар занону духтароне муроҷиат мекунанд, ки мушкилоти вазнини оилавӣ ва ё баҳси молу мулкии вобаста ба он доранд.

“Бештар заноне, ки ба шароб, сигор ва маводи мухаддир рӯ меоранд, дар ҳаёт сахт шикаст хӯрдаанд ва аз ҷониби наздикон дастгирии зарурӣ намебинанд. Дар баробари мушкилоти шахсӣ мушкилоти иҷтимоӣ ҳамчун табъизи занони ҷудошуда онҳоро бештар ба мушкилоти равонӣ мувоҷеҳ менамояд”,-гуфт ӯ.

Ин масъули маркази худшиносии бонувон дар Душанбе аз таҷрубаи кории худ гуфт, сигоркашӣ як одат ё боварии шахси дармонда ба ҳалли мушкилот аст: “Ба заноне, ки ба чунин одат ба маркази мо муроҷиат мекунанд, маслиҳат медиҳам аз ин амал даст кашанд ва маблағе, ки барои ин мавод сарф мекунанд, барои беҳбуди ҳаёти худ харҷ намоянд.”

Аммо дар миёни занону духтарони тоҷик онҳое ҳам будаанд, ки натанҳо аз рӯи мушкил, балки аз рӯи ҳавою ҳавас ба кашидани сигор рӯ овардаанд. Гулчеҳра, як ҳамсӯҳбати ҷавони мо мегӯяд, атрофиёнаш ҳама сигор мекашиданд ва ӯ ҳам хостааст, ин корро таҷруба кунад. “Ин танҳо як ҳавас буд. Рӯзе хостам, фаҳмам, ки кайфияти сигор чигуна аст ва ба чӣ хотир дӯстонам сигор мекашанд. Ҳамин тариқ, сигор кашидаму дигар аз он даст кашида натавонистам”,-афзуд ӯ.

Ин дар ҳолест, ки ба қавли Ҳалима Аҳмадова, мудири шӯъбаи бемориҳои шуши бемористони Қарияи Боло, зиёни сигор ба вазъи саломатии занону духтарон назар ба мардон бештар аст. Ба қавли ӯ, агар мардҳо 2-3 сол сигор кашанду партофтанашон осон шавад, занҳо ин марҳиларо хеле ба сахтӣ пушти сар хоҳанд кард. Ҳамон тавре ки бархе аз ҳамсӯҳбатони мо ба ин мушкил рӯбарӯянд.

Илова ба ин, мегӯяд Аҳмадова, “мабодо зан ҳомила бошад, таъсири он бештар ба кӯдак мерасад. Ҳамон кӯдаке, ки аз модари сигоркаш таввалуд мешавад, ба ягон норасоӣ аз ҷумла норасоии ягон узви бадан, иммунитети паст таввалуд мешавад. Бештар сигоркашӣ ба бемориҳои бронхит гирифтор мекунад. Бронхит ба илтиҳоби музмини роҳҳои нафас оварда мерасонад, ки бештар сулфа мекунанд.”

Бо ин ҳама, ҷомеаи Тоҷикистон суннатист ва кашидани сигор аз сӯи занон кори қобили қабул шуморида намешавад. Аммо ба далели ин ки Тоҷикистон аз рӯи Қонуни асосияш кишвари дунявист, сигоркашии бархе аз занону духтарони тоҷик ба мухолифатҳои шадид рӯбарӯ нашудааст.


Шарҳи худро бинависед:

Ном:*
E-Mail:
Матни шарҳ:
Посух додан
  • ЗАФР КУРБОНОВ

  • 30 май 2013 18:46
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
МАСЧИДХОРО БАНДЕД. ФАТВОХОИ ГАРИАРЪИ КИ ЗАНОНРО МАНЪ МЕКУНАД А МАСЧИД РАФТАНАШРО БАРОРЕД. 10 СОЛ БАЪД ЧОЕМА ЯК МОДАРИ СОЛИМ ЗАНИ СОЛИМ ДУХТАРИ СОЛИМ Е ХОХАРИ ССОИМ ДОШТАНРО АЗ ЕД МЕБАРОРАД, ИНШОАЛЛОХ!

Матолиби ҳамсон:

Бойгонӣ

«    Декабр 2016    »
ДушСешЧорПанҶумШанЯкш
 1234
567891011
12131415161718
19202122232425
262728293031 


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!