Русский  >>  فارسی  >>  Сешанбе 6 декабр 2016, 17:10

Пешниҳоди ба додгоҳ кашидани Файзи Олӣ, адвокати Димон

20 июн 2013, 11:04

Вакилони мудофеи шинохтаи Тоҷикистон, аз ҷумла Файзиннисо Воҳидова ва Шӯҳрат Қудратов, изҳороти ахири Файзи Олиро дар мавриди нафари таҳти ҳимояташ -- Димон Ашӯров, маҳкум карданд.

Шӯҳрат Қудратов изҳороти Файзи Олӣ, ки зерҳимояаш Димон Ашӯровро яке аз фаъолону саркардаҳои оламии ҷиноии Бадахшон гуфту ҳукми додгоҳро нисбат ба ӯ сабук арзёбӣ кард, “як доғ барои адвокатура дар Тоҷикистон” номид.

Қудратов, ки дар гузашта аз Димон Ашӯров ҳимоя мекард, ҳукми додгоҳро нисбат ба ӯ ноодилона хонд ва изҳороти Файзи Олиро беасос ва мухолифи арзишҳои маънавӣ арзёбӣ намуд: “Файзи Олӣ дар мавриди зерҳимояаш на ҳамчун адвокат, балки муфаттиш мавқеъгирӣ кардааст.”

Файзиннисо Воҳидова, ҳуқуқдони тоҷик, низ изҳороти Файзи Олиро маҳкум карда, таъкид намуд, ки барои чунин гуфтаҳо Димон Ашӯров ҳақ дорад, аз болои адвокаташ ба додгоҳ муроҷиат намояд: “Изҳороти Файзи Олӣ, вакили мудофеи Димон Ашӯров ва Шерик Карамхудоев мухолиф ба қонунгузории Тоҷикистон мебошад. Адвокат ҳақ надорад, ба муқобили мавқеи зерҳимояаш баромад кунад. Агар вобаста ба ҳодисаҳои Бадахшон гумонбар худро ҷинояткор наҳисобаду адвокаташ ӯро ҷинояткор хонад, чунин адвокатро ба додгоҳ кашидан лозим. Баромади Файзи Олиро дидам ва ҳаминро мегӯям, ки аз рӯи одоби касбӣ ҳам нест.”

Воҳидова зарур мешуморад, ки “Вазорати адлияи Тоҷикистон як коллегия ташкил кунаду рафтори ҳамин адвокатро баррасӣ кунад. Шояд ба ин адвокат таҳдид ва фишор овардаанд, ки ахиран ба ин изҳорот даст задааст, вале бо вуҷуди ин, ӯ чунин ҳақ надошт.”

Инчунин Воҳидова таъкид намуд, ки зерҳимоя ҳақ дорад, баъзе иттилоъро аз вакили мудофеаш пинҳон дорад.

Файзи Олӣ, вакили мудофеи Димон Ашӯров, ки дар вилояти Бадахшон бо номи қаблияш -- Давлатбек Давлатбеков машҳур аст, рӯзи 19-уми июн дар суҳбат бо “Озодагон” лаҳни шадиди изҳороташ дар мавриди зерҳимояашро шарҳ дода, гуфт, нафари таҳти ҳимояташ зимни тафтишот бисёре аз ҷиноятҳои вазнинро аз ӯ пинҳон доштааст: “Димон Ашӯров бояд ба ман тамоми ҳаракатҳои содиркардаашро баён мекард, то аз нигоҳи ҳуқуқӣ роҳи наҷоти ӯро пайдо мекардам. Ҳатто агар ҷиноятҳои сангин ҳам содир мекард, бояд аз ман пинҳон намедошт. Ин як маҳрам миёни адвокату ҳимояшаванда аст, қонун инро манъ накардааст. Аммо зерҳимояам маро ба гумроҳӣ бурд.”

Файзи Олӣ афзуд, "он айбе, ки мақомот алайҳи Димон эълон карда буданд, аз сад айбаш ҳатто як айбашро ҳам ташкил намедиҳад. Дар ҳоле, ки мо худамонро дар хатар гузошта мақомоти тоҷикро интиқоди шадид мекардем, алайҳи айбдоркунандаи давлатӣ гапҳои сахт мегуфтем ва адолати судиро зери суол бурдему талош мекардем, бегуноҳии зерҳимояаамонро нишон диҳем. Аммо баъдан одамони огоҳи Бадахшон далоил оварданд, ки зерҳимояам аз фаъолони олами ҷиноии Бадахшон будааст.”

Додгоҳи Олии Тоҷикистон аввали моҳи май Димон Ашӯров ва Шерик Карамхудоев, ду сокини шаҳри Хоруғро, ки тобистони соли гузашта боздошт шуда буданд, барои 12 ва 14 сол равонаи зиндон карда ва марҳилаи кассатсионӣ ин ҳукмро ахиран бетағйир боқӣ гузошт. Ин ду сокини Хоруғ дар ҷиноёти вазнине амсоли «ташкили иттиҳоди ҷиноӣ», «бетартибиҳои оммавӣ», ва «истифодаи зӯроварӣ ба муқобили намояндаи ҳукумат» айбдор мешаванд.

Дар акс: Файзи Олӣ, вакили мудофеъ (Акс аз торнамои телевизиони "K+")


Шарҳи худро бинависед:

Ном:*
E-Mail:
Матни шарҳ:
Посух додан
  • Сотсиалист

  • 20 июн 2013 13:37
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
Аз "шогирди" Сафарали Кенчаев - "Катании точик" боз чиро интизор шудан мумкин буд? Эх Файзи Оли...
Посух додан
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
Аз хами омбудсмену адвокати Шерику Димон ягон носфуруши кади кучара намебурдан, як нос мезаду мегуфт: Нос аст ки тороч кунад хонаи гамро,
яксолаву дувоздахсолаву чордахсола аламро!

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!