06 июл 2013 08:48Тоҷикистон / Иқтисодӣ

Бақозода: “Касе ду ширкат мекушояд, ба рӯйхати сиёҳ ворид мешавад”

Қаҳрамон Бақозода, роҳбари Маркази тадқиқоти сотсиологии “Зеркало”, мегӯяд, дар Тоҷикистон нафареро, ки ба номаш ду ширкат ё ташкилот мекушояд, ба рӯйхати сиёҳ ворид мекардаанд.

Бақозода зимни ҳамоиши «Мусоидат намудан ба соҳаи бизнес дар самти амалӣ намудани қонунгузории нави андоз, ҳамчунин ҷамъи пешниҳодҳо ва омодасохтани тавсияҳои мувофиқ» дар шаҳри Душанбе гуфт, “як вақт мехостам ташкилоти дигареро ба номи худ кушоям, аммо дустонам гуфтанд, ки дар Тоҷикистон дар зери номи худ ду ташкилотро кушода наметавонӣ. Агар кушоӣ дар руйхати сиёҳ номнавис мешавӣ”.

Саидаҳтам Абдуллоев, масъули воломақоми Кумитаи андоз, ин иддаоро рад накарда, суол гузошт, ки чӣ зарурат дорад, як шахс ба номи худ ду ё зиёда ширкат кушояд: “Аз рӯи қонунгузорӣ дар доираи як ширкат метавонӣ 100 намуди фаъолиятро роҳандозӣ кунӣ. Ягон маҳдудият нест.”

Ин масъули Кумитаи андоз мавҷудияти рӯйхати сиёҳро таъйид карда, афзуд, ки ин рӯйхат ба он хотир шудааст, ки “баъзе нафарон дар зери номашон 2-3 ширкат навишта буданд ва аз андозсупорӣ даст кашидаанду ҳоло онҳоро пайдо карда намешавад.”
Аммо Қаҳрамон Бақозода суол гузошт, ки “фарқаш чӣ, ки дар номи худ чанд ширкат кушоем. Мо андоз месупорем ку. Дар куҷои қонун навишта шудааст, ки мумкин нест.”

Абдуллоев посух дод, “аз ин ҳолате ки шумо пешниҳод доред огоҳ нестам” ва афзуд, ки дар Тоҷикистон бисёри мушкилотҳо аз нофаҳмии қонунгузории андоз сурат мегирад.

Ӯ аз ассосиатсияҳо интиқод намуд, ки бо Кумитаи андоз ҳамкории суст доранду корҳои фаҳмондадиҳиро суст ба роҳ мондаанд: “Аз рӯи феҳристи ягона дар Тоҷикистон беш аз 40 асотсиатсия номнавис шудааст. Ман дар назар дорам асотсиатсияҳое, ки бевосита ба дастгирии соҳибкорӣ вобаста ҳастанд. Аммо мутааъсифона дар самти фаъолияти худ корҳои фаҳмондадиҳӣ ба андозсупорандагонро кам мегузаронанд. Ба ғайр аз 3 асотсиатсия ҳамкории дигари онҳо бо мо хеле суст мебошад.”

Абдуллоев инчунин зикр кард, ки дар сомонаи кумитаи андоз навишта шудааст, ки “ҳар фикру ақидае, ки дар масъалаи кодекси андоз доред, ирсол намоед, аммо аз аввали моҳи январи соли ҷорӣ то ба имрӯз ягон андозсупоранда фикру ақидаи худашро нанавиштааст.”
Аммо намояндагони доираҳои соҳибкорӣ мегӯянд, дар марҳилаи таҳияи Кодекси нав ҳазорҳо пешниҳодро ироа кардаанд, вале мақомот аз ҷумла Кумитаи андоз аксари онҳоро сарфи назар намуд.

Мӯҳр

Хабарҳои монанд: