Додоҷони Атовуллоҳ: “Ман дар роҳи дуруст ва ҳақ ҳастам”
Додоҷони Атовуллоҳ, журналист ва раҳбари ҷунбиши сиёсии “Ватандор”, ки рӯзи 15-уми июл ҳангоми бозгашт аз Прага дар фурудгоҳи Шереметевои Маскав боздошт гардид, дубора ба маркази Ҷумҳурии Чех фиристода шудааст.
Ӯ дар як тамоси кӯтоҳ ба “Озодагон” гуфт, сиҳҳату саломат аст ва мехоҳад қазияи боздошти ӯ таҳқиқ бишавад. Оқои Атовуллоҳ баъд аз он ки ба Прага расид, дар саҳифаи Фейсбуки худ ҳам навишт, ки “аз ин боздошти ногаҳонӣ хулоса баровардам, ман дар роҳи дуруст ва ҳақ ҳастам.”
Вай лаҳзаи боздошти худро чунин тасвир кардааст: “Маро дар ҷойгоҳи контроли гузарномаҳо боздошт ва ба як ҳуҷраи махсус бурданд. Дар лаҳзаҳои аввал тарс маро фаро гирифт. Зеро ҳеч кас сӯҳбат намекард, ба чашмон нигоҳ намекарданд, балки фақат дастур медоданд, ки ин ҷо бишин, мунтазир бимонед... Сипас тавонистам аз тариқи телефон тамос бигирам ва то он ҷо ки алъон мефаҳмам, дар ВАО хабари боздошти ман ба сурати густардае инъикос пайдо кардааст.”
Баъд аз он, менависад Додоҷони Атовуллоҳ, муомила бо ӯ ба тарзи чашмгире тағйир ёфт ва дарҳол барояш қаҳваву сигор овардаанд. “Сипас ба ман пешниҳод шуд, ки барои бозгашт ба Прага билет бихарам ва ман парвоз кардам. Хулоса ва натиҷаи ман аз ин ҳама, ба шарҳи зерин аст: Аввалан, боздошти ман дар фурудгоҳ тасмими сиёсии раҳбарияти Русия нест, балки дар пушти ин тавтиа лоббиҳои раисиҷумҳури Тоҷикистон Эмомалӣ Раҳмон қарор доранд. Мутаассифам, ки дар иқдомоти сиёсати хориҷии Русия чеҳраҳои машкуке таъсиргузор ҳастанд”,-навиштааст ӯ.
Дар охир оқои Атовуллоҳ гуфтааст, “эътибор ва ҷойгоҳи Русия тақозо мекунад, ки дар ин маврид таҳқиқот анҷом бигирад ва бидонанд, ки бо дастури чӣ касе ман боздошт шудам?!”
Додоҷони Атовуллоҳ, муассис ва сардабири нашрияи “Чароғи рӯз”, дар пайи ҷанги дохилии Тоҷикистон кишварро тарк карда, дар Русияву Олмон ба сар мебарад. Мақомоти Тоҷикистон ӯро дар таҳқири раисиҷумҳур ва ҳамчунин даъват ба сарнагунии низом муттаҳам медонанд. Бори охир Додситонии кулли Тоҷикистон соли 2011 нисбат ба ӯ парвандаи ҷиноӣ боз намуда, аз Русия тақозо карда буд, Атовуллоҳро ба Ватан истирдод намояд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |