Таънаи раиси Шаҳритус аз нафаре, ки планшет харидан нахост
Ҷумъахон Сафаров, раиси ноҳияи Шаҳритус, дар нишасти хабарии хеш иттилоъро дар хусуси аз ҳисоби ташкилоту идораҳо харидорӣ шудани планшет барои тақдими онҳо аз номи президент ба кӯдакони ятиму бепарастор рад накарда, нафарони эътирозгарро таъна ҳам зад.
“Ҳозир ҳама чизро менависанд дар интернет. Ман фаросат дорам, ақл дорам, бесавод нестам. Ман гуфтам, ки сафари ҷаноби олӣ мешавад ва пурсидам, кӣ чӣ хел имконият дорад. Супориш буд, ки барои 49 нафар бояд планшет барем. Ин ихтиёрӣ буд. Вале ин кори ташкилоти ғайридавлатист. Аммо дуто планшети ОБСЕ ва “Ҳамдилон”-ро гардонида додем баъди баромадани ин гап. Онҳо сахт хафа шуданд ва гуфтанд, ки ин хайри мо аст. Баъзе ташкилоте ҳастанд, ки дар ягон кори ободонӣ ҳам иштирок намекунанд ва ҳам касро ганда мекунанд. Ин гуна корҳоро аз аввал бо дастгирии соҳибкорон ҳал мекарданд. Дар буҷети маҳаллӣ ин гуна маблағ нест. Пулаш қариб 8 ҳазор доллар мешуд”,-гуфт раиси ноҳияи Шаҳритус.
Ёдовар мешавем, чанд рӯз қабл аз сафари кории президент Эмомалӣ Раҳмон ба шаҳру ноҳияҳои минтақаи Қӯрғонтеппаи вилояти Хатлон як корманди созмони ғайриҳукуматии мустақар дар ин ноҳия ба Озодагон гуфт, онҳоро барои харидории планшет маҷбур карда истодаанд. Ба қавли ин нафар, ки нахост номаш ифшо шавад, Ҷумъахон Сафаров, раиси ноҳияи Шаҳритус, ӯ ва дигар намояндагони созмонҳои ғайриҳукуматӣ, бонкҳо ва тоҷиронро ҷамъ карда, дар ин бора суҳбат кардааст.
“Раис ҳамаро вазифадор кард, ки яктогӣ планшет бихаранд. Ин планшетҳоро президент ҳангоми сафараш ба ятимони шаҳри Қӯрғонтеппа тақдим мекардааст”,-афзуд ин нафар. Ба гуфтаи ӯ, аз онҳо барои харидории ин планшетҳо тақрибан дусаддолларӣ талаб кардаанд. “Аз мо хостанд, ки ҳар кадомамон то якуми июл 850 сомонӣ бипардозем. Имрӯз ҳам занг зада ва ёдрас карданд, ки вақт наздик омадааст”,-илова кард ӯ. Ин корманди яке аз созмонҳои ғайриҳукуматӣ мегӯяд, раиси ноҳияи Шаҳритус дар суҳбат ба онҳо гуфтааст, “ин фармон аз болост”. Дар ҳоле, ки ба гуфтаи ӯ, “ман ҳамагӣ 500 сомонӣ маош дорам. Аз куҷо бояд дар чаҳор рӯз 200 доллар пайдо намоям?”
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |