23 авг 2013 12:03Тоҷикистон / Сиёсат

Конфронсҳои бузурги об чӣ медиҳанд?

Дар пасманзари гуфтугузорҳо оиди камтаъсирии конфронсҳои бузурги обу энержӣ, “Озодагон” аз коршиносон, суол кард, ки баргузории форуми байналмиллалии об, мушкили минтақаиро бартараф мекунад?

Вафо Ниятбеков, корманди Маркази тадқиқоти стратегӣ

Баргузории чунин як конфронс дар Тоҷикистон муҳим аст. Баъзе аз кишварҳои Осиёи марказӣ, аз ҷумла Узбакистон масъалаи обро зиёд сиёсӣ мекунанд. Тоҷикистон дар умум масъалаи обро сиёсӣ намекунад. Узбакистон дар минбарҳои байналмиллалӣ бештар масъаларо аз зовияе матраҳ мекунад, ки манфиати бештар бибинад. Ин форуме, ки дар Тоҷикистон баргузор мешавад ва намояндагони зиёд аз СММ меоянд, ин ҳам як намуди муаррифии кишвар аст. Бо ин роҳ дипломатҳо ба Тоҷикистон ва мушкилоти об мутаваҷҷеҳ мешаванд. Онҳо огоҳӣ пайдо хоҳанд кард, ки Тоҷикистон бештар тарафдорӣ баратараф кардани ин мушкилот аст.

Георгий Кошлаков, коршиноси бахши энержӣ

Баргузории ин форум барои Тоҷикистон бисёр муҳим аст. Дар ин гуна чорабинӣ ҷонибҳо сари миз менишинанд, ба ҳарфи якдигар гўш медиҳанд. Ин беҳтар аз он аст, ки умуман ҳамкорӣ набошад миёни ҷонибҳо.

Парвиз Мулоҷонов, таҳлилгари масоили сиёсӣ

Баргузории формуи байналмиллалӣ ва умуман мусоидати он барои бартарафи кардани мушкилоти об дар минтақа бештар аз барнома ва нақшаи таҳияи он вобаста аст. То чӣ ҳад дурнамои ин форумро масъулин тарҳрезӣ кардаанд, ҳоло дақиқ нест. Агар баъди анҷоми форум коре пешбинӣ шавад, ки ҷонибҳо барои оянда боз сари миз оянд, ялбатта натиҷаи мусбат медиҳад. Вале агар ин нишасти якдафъаина ҳасту, танҳо ваъдаҳо болои варақ, пас аз ин чандон хушбин буда наметавонем.

Мӯҳр

Хабарҳои монанд: