Хадамот дар бораи писари Қоимдодов: “Мӯйро аз хамир ҷудо накардаем”
Хадамоти гумруки Тоҷикистон то ҳоло муайян накардааст, миёни ду нафаре, ки рӯзи 16-уми сентябр ба гумони қочоқи маводи мухаддир дар фурудгоҳи Душанбе боздошт шуданд, писари Қозидавлат Қоимдодов, сафири Тоҷикистон дар Беларус низ ҳаст, ё на.
Нурулло Шарифов, як масъули дафтари матбуоти Хадамоти гумрук ба “Озодагон” гуфт, ҳанӯз дар ин замина тафтишот идома дорад ва даст доштани Қоимдод Қоимдодов дар интиқоли маводи мухаддир дақиқ нашудааст. Вай афзуд, “воқеан, дирӯз 2 нафар аз ҷониби кормандони Хадамоти гумрук дар фурудгоҳи Душанбе бо 2,5 кило ҳероин боздошт шуданд. Дар назар аст, имрӯз то бегоҳ тафтишот сари ин масъала ба анҷом рассад. Баъд аз муайян шудан расман маълумот медиҳем, ки дар интиқоли маводи мухаддир киҳо даст доштаанд.”
Рӯзи душанбеи 16-уми сентябр як масъули гумрук дар фурудгоҳи байналмилалии Душанбе хабар дод, ки Қоимдод Қоимдодов, писари Қозидавлат Қоимдодов, сафири Тоҷикистон дар Беларус дар фурудгоҳи байналмилалии Душанбе боздошт шудааст. Ба қавли манбаъ, Қоимдодов дар ҳоле боздошт шуда, ки талош доштааст, тариқи хатсайри Душанбе-Маскав дуним кило ҳероинро интиқол бидиҳад.
Манбаъ иброз намуда буд, ки дар баробари Қоимдодов дастандаркорони дигари қочоқи мухаддирот низ боздошт шудаанд, аммо аз ифшои ҷузъиёти бештари қазия худдорӣ кард. Дар бораи писари Қозидавлат Қоимдодов иттилои кофӣ дар даст нест. Ҳарчанд дар шабакаҳои иҷтимоӣ бо номи “Қоимдод Қоимдодов” саҳифаҳои мухталифе мавҷуданд, аммо кадоме аз онҳо дар бораи писари сафири Тоҷикистон дар Беларус будани ӯ дарак намедиҳанд.
Талоши мо барои дақиқ кардани боздошти писари Қозидавлат Қоимдодов аз сӯи сафорати Тоҷикистон бенатиҷа буд. Вале рӯзи 17-уми сентябр баъзе аз расонаҳо навиштанд, гӯиё Қоимдодов барои озод кардани писараш ба Душанбе омадааст. Иттилое, ки ҳанӯз расман аз сӯи сафорат тасдиқ нашудааст.
Қозидавлат Қоимдодов аз моҳи октябри соли 2009 сафири Тоҷикистон дар Беларус мебошад. Дар соли 1992 муоивни раиси Шӯрои олии Тоҷикистон ва аз соли 1995 то 2000 вакили парлумон буд. Вай ба ҳайси ноиби нахуствазир ва ҳамоҳангсози барномаҳои Бунёди Оғохон дар Тоҷикистон ва сафири кишвар дар Туркманистон низ кор кардааст.Дар акс: Қозидавлат Қоимдодов, сафири Тоҷикистон дар Беларус ва падари Қоимдод Қоимдодов
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |