Русский  >>  فارسی  >>  Ҷумъа 9 декабр 2016, 05:01

Ҳимояти Стивенсон аз ТАЛКО, интиқодаш аз Узбакистон

18 сентябр 2013, 16:43

Струан Стивенсон, вакили парлумони Аврупо, бо нашри мақолае эътирози баъзе аз кишварҳои ҳамсоя алайҳи ширкати алюминиюми Тоҷикистон – ТАЛКО-ро беасос хондааст. Оқои Стивенсон, ки дар гузашта ҳам борҳо аз сохтмони Роғун ҳимоят карда буд, дар мақолаи худ гуфтааст, ҳоло замони он нест, ки ТАЛКО аз миён бурда шавад. Балки ба гуфтаи ӯ, ҳоло фурсати он аст, ки ин корхонаи бузурги саноатӣ ва барои Тоҷикистон муҳим азнавсозӣ гардад.

Ин вакили парлумони Аврупо, ки гоҳо аз ӯ “дӯсти тоҷикон” ном бурда мешавад, ТАЛКО-ро дурдонаи тоҷи Тоҷикистон номида ва гуфтааст, ин корхона дар ҳоли ҳозир 13 ҳазор нафарро бо ҷои кор таъмин мекунад.

Вай дар мақолаи худ иддаои баъзе аз кишварҳои ҳамсоя, бахусус Узбакистонро дар бораи зарари партовҳои ТАЛКО ба муҳити зист ба баррасӣ гирифта, онро “бадхоҳона” донистааст. Вай гуфта, ки “шояд ҳамчун яке аз корхонаҳои саноатии бузургтарин дар минтақа ва яке аз 10 истеҳсолкунандаи бузургтарини алюминий дар ҷаҳон, ширкат пас аз худ партовҳои истеҳсолӣ боқӣ мегузорад, чунки чунин равандҳои нерӯталаб бе ин омил наметавонанд арзи вуҷуд кунанд. Ин маънои онро дорад, ки корхона бояд навсозӣ карда шавад, на балки аз кор бароварда шавад ва умуман барҳам дода шавад, ба он гунае, ки баъзе эътирозгарон аз кишварҳои ҳамсояи поёноб талаб мекунанд.”

Ин вакили парлумони Аврупо дар идома мегӯяд, дар ҳоли ҳозир талош ба харҷ дода мешавад, то мушкили партовҳои олудакунандаи ТАЛКО аз байн бурда шаванд. “Талабҳо барои аз кор баровардани корхона ва маҳдудсозии фаъолияти ТАЛКО бемаврид ва ғайри мутаносиб буда, ба таҳдидҳо ва суханпардозии пропагандистии ҷунбишҳои экологӣ дар кишварҳои зиёди ғарбӣ шабоҳат доранд”,-таъкид доштааст ӯ.

Струан Стивенсон мегӯяд, “баҳсҳои сиёсӣ ва оштинопазирӣ танҳо ба бунбаст мебаранд, мушкилоти зиёдтар бунёд месозанд, хавфи оқибатҳои бебозгаштро барои муҳити зист афзун мекунанд ва сабаби якбора паст шудани шароити зиндагии миллионҳо одамон дар минтақа мешаванд.”

Ба қавли ин вакили парлумони Аврупо, “бо эътирофи зарурати таъхирнопазирии ҳаллу фасли мушкилот, роҳбарияти “ТАЛКО”, мувофиқи маълумоти мавҷуда, бо Институти ботаникӣ, Академияи улум, Институти тибби профилактикӣ ва Вазорати тандурустӣ, инчунин бо як қатор созмонҳои бонуфузи байналмилалӣ дар соҳаи ҳифзи муҳити зист ҳамкориро бо мақсади омӯзиши таъсири моддаҳои олудакунанда ба олами наботот ва ҳайвоноти минтақаи атроф ба роҳ мондааст. Олимони “ТАЛКО” инчунин иброз медоранд, ки онҳо ҳамарӯза олудашавии фазо, таркиби об ва сатҳи радиатсияро месанҷанд.”

Маълумот:

Струан Стивенсон, Вакили ҳизби Муҳофизакорон, намояндаи Шотландия дар Парлумони Аврупо; Президенти Гурӯҳи Парлумони Аврупо оид ба
тағйирёбии иқлим, гуногуншаклии биологӣ ва рушди устувор; соли 2010 ба ҳайси намояндаи шахсии Раиси Созмони амният ва ҳамкорӣ дар Аврупо (САҲА) оид ба тайёр намудани гузориш дар мавзуи мушкилиҳои муҳитзистии Осиёи Марказӣ фаъолият бурдааст.


Шарҳи худро бинависед:

Ном:*
E-Mail:
Матни шарҳ:
Посух додан
  • душанбе

  • 19 сентябр 2013 08:34
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
Ягон рагш точикай чи?

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!