27 сен 2013 15:27Тоҷикистон / Сиёсат / Тема дня

Бозҷӯии дигарбораи ҷонибдорони Бобоназарова дар Душанбе

Ситоди интихоботии Ойниҳол Бобоназарова, номзади ягонаи ислоҳотхоҳон, имрӯз, 27-уми сентябр, аз дахолати дигари маъмурони пулис ба ҷараёни ҷамъкунии имзоҳо хабар дод.

Тавре аз Ситоди мазкур ба “Озодагон” иттилоъ доданд, як гуруҳи ҷамъоварандагони имзо ба тарафдории Бобоназарова дар ноҳияи Исмоили Сомонӣ имрӯз аз ҷониби кормандони пулис мавриди бозпурсӣ ва бозҷӯӣ қарор гирифтаанд. Фатҳиддин Усмонзода, масъули шуъбаи ҷавонони ҲНИТ ба “Озодагон” гуфт, чор пулис бо нишон додани ҳуҷҷат ва муаррифӣ кардани худ ҳамчун кормандони шуъбаи шашум се нафар-ду духтар ва як ҷавонро, ки ба ҷамъоварии имзо машғул буданд бозпурсию бозҷӯӣ карда, ният доштаанд, онҳоро ба идораи пулис баранд, вале баъдан аз ин райъи худ гаштаанд.

Ин дар ҳолест, ки рӯзи гузашта низ маъмурони пулиси ноҳияи Фирдавсии Душанбе масъули дафтари Ҳизби Наҳзати Исломӣ дар ин ноҳия ва гуруҳе аз ташаббускорони ҷамъоварии имзо ба тарафдории Ойниҳол Бобоназароваро боздошт ва баъд аз тақрибан ду соати боздошт раҳо кардаанд.

Насим Раҷабов, масъули дафтари ҲНИТ дар ноҳияи Фирдавсӣ, гуфт, онҳоро ба гумони қалбакӣ будани мӯҳри раиси ҳукумати ноҳия дар варақаҳои ҷамъоварии имзо боздошт намуда буданд. Вале ба қавли ӯ, “ин шубҳаву гумони пулис дар бинои ҳукумати ноҳия исбот нашуд ва моро ҷавоб доданд”.

Ситоди интихоботии Ойниҳол Бобоназарова, номзади ягонаи ислоҳотхоҳон, дар ҳол ба ин ҳодиса вокуниш нишон дода ва гуфта буд, “умедворем, Шермуҳаммади Шоҳиён барои ҳарчи зудтар озод шудани онҳо ба вазири умури дохилӣ ва ё сардори ШКД-и ноҳияи Фирдавсӣ занг мезанад.” Дар ҳоле ки ба бовари онҳо, “варақа пул набошад, ки сохта бошад. Ба он раиси ноҳия мӯҳр мезанад, баъд гурӯҳи ташаббускорон дар он варақаҳо имзо ҷамъ меоранд. Ақли солим мегӯяд, ки онҳо ин корро ҳаргиз намекунанд, зеро дар охир боз раиси ноҳия он варақаҳоро аз зери назорат мегузаронад.”

Ташаббускорон қабл аз он ки ба ҷамъоварии имзо дар навоҳӣ шурӯъ кунанд, дар варақаҳои махсус мӯҳри раиси ҳукумати ноҳияҳоро мегиранд. Қаблан, ситоди интихоботии Бобоназарова аз он шикоят карда буд, ки баъзе аз роҳбарони шаҳру навоҳӣ бо баҳонаҳои мухталиф аз гузоштани мӯҳр худдорӣ менамоянд. Камбуде, ки масъулони Кумисюни марказии интихобот ҳам онро тасдиқ карда, вале гуфта буданд, ки он ҳалшаванда аст.

Мӯҳр

Хабарҳои монанд:

Дилшод

Апаи Ойниҳол Бобоназарова биёед басаш кунед. Аз баҳри ҳамин интихобот ҳам гузаред монед Раҳмонро 7 сол нею 70 соли дигар ҳукумрон бошад. Қавме ки ғуломиро бар озодӣ бартари медиҳад барои чунин қавм ғам хурдан ҳайф аст.

Ҷавоб диҳед Иқтибос Шикоят

тарафдор

ҳар боре ки чунин ахборро мехонам, ба чунин муборизон, ки новобаста аз монеасозиҳо боз кори худро идома медиҳанд, аҳсант мехонам. ҳамин нафарон ҳастанд, ки ба олами мутамаддин пайваст будани ҷомеаи моро ба субут мерасонанд. вагарна, бо ин иқдомоту гомҳои мақомоти расмӣ назди берунагони дур албатта, шарманда мешудем. вуҷуду муборизаи ин гуна ҷавононмардон натанҳо ба ҲНИТ балки ба ҳамаи нирӯҳои сиёсиву ғайрисиёсии ҷумҳурӣ як нишони ифтихор ва сарбаландист. бори дигар ба чунин ҷавонмардон, гарчи миёни эшон занону ҷавондухтарон низ кам нестанд, аҳсант мехонам ва умедвори онам, ки Худованд саъйу талоши эшонро зойеъ намесозад. Худонанд нигаҳбонатон бошад, ҷавонмардони миллат.

Ҷавоб диҳед Иқтибос Шикоят

махмад

Шарми кас меояд аз ин гиромбзихо

Ҷавоб диҳед Иқтибос Шикоят

Эзоҳ илова кунед