Тарки мактаб дар Хатлон ҷилавгирӣ мешавад?

Ҷеффри Лерер, сарвари  Оҷонсии ИМА оид ба рушди байналмиллалӣ дар Тоҷикистон ва Абдуҷаббор Раҳмонов, вазири маорифи  Тоҷикистон мактуби ҳамкориро ба имзо расониданд, ки он баёнгари нияти ҳамкории онҳо оид ба татбиқи Барномаи сесолаи озмоишии пешгирии тарки мактаб (БОПТМ) мебошад. 

Дар ин бора ба «Озодагон» аз сафорати Амрико дар Душанбе хабар доданд. Сарчашмаи иттилоъ афзуд,  мақсади Барнома пешгирии тарки мактаб аз тарафи хонандагон буда, дар вилояти Хатлон тибқи Стратегияи  миллии таълим амалӣ гардонида мешавад.  Барнома фаъолиятҳои ҷории USAID-ро бо  мақсади дастгирии вазорати маориф  барои тавсеаи дастрасӣ ба таълими ибтидоӣ ва миёнаи босифат дар Тоҷикистон  пурра мегардонад. Давлатҳои Камбоҷа,  Ҳиндустон ва Тимори Шарқӣ низ дар ин барнома ширкат меварзанд.

Дар ҷараёни маросими имзокунӣ ҷаноби Леҳрер иброз дошт: «USAID ва вазорати маориф ба мувофиқае расиданд, ки мо бояд тарки таҳсилро аз ҷониби мактаббачагон дар Тоҷикистон пешгирӣ намоем.  Нисфи аҳолии Тоҷикистонро ҷавонони то синни 19-сола ташкил мекунанд.  Онҳо бояд таълими хуб гирифта шаҳрванди фаъол бошанд ва дар рушди иқтисодии кишварашон саҳми хешро гузоранд». Низоми иттилоотии идоракунии соҳаи маорифи Тоҷикистон  дараҷаи баландтарини тарки мактабро дар синфҳои нӯҳ ва даҳ нишон медиҳад.  Тарки мактаб аз ҷониби шогирдон бо сабабҳои гуногуни иқтисодӣ, иҷтимоӣ ва фарҳангӣ рух дода ба зиёд шудани шумораи ҷавонони камсавод ва ғайри қобилияти корӣ оварда мерасонад.  Барнома он кӯдаконеро, ки зимни хавфи бештари тарки таҳсил қарор доранд муайян намуда, бо маъмурияти мактабҳо, муаллимон, шогирдон, падару модарон ва ҷомеа ҳамкорӣ мекунад, то ки тадбирҳои дар мактаб нигоҳ доштани кӯдаконро муайян карда, амалӣ ва арзёбӣ намояд.

Ёдрас менамоем, аз соли 1992 инҷониб, Амрико барои барномаҳое, ки муассисаҳои демократӣ, соҳаи тандурустӣ, маориф ва рушди иқтисодиро кӯмак мекунанд, тақрибан 900 миллион доллари амрикоӣ масраф кардааст. Мӯҳр