Шикояти модари Азиза ва Шокир аз болои А.Ҳукуматулло (Видео)
Нилуфари КАРИМ
Модари Шокир Маҳкамов ва Азиза Рӯзиева, ду маҷрӯҳи садамаи нақлиётии шаби 9 октябр бо иштироки Расули Амонулло -- писари раиси Роҳи оҳани Тоҷикистон мегӯянд, намедонанд, бо фарзандони бемори худ чӣ кор кунанд. Дар ҳоле ки, ба гуфтаи онҳо, барои табобати фарзандон ва пардохти ҳаққи бемористон маблағе надоранд.
Гулнора Рӯзиева -- модари Азиза мегӯяд, ду бор, 8 ва 9 ноябр, барои кумакхоҳӣ ба ширкати Роҳи оҳани Тоҷикистон рафта, аммо муваффақ нашудааст, Амонуллои Ҳукуматуллоро аз наздик бубинад ва ин масъаларо дар миён гузорад. Ӯ мегӯяд, ҳамроҳаш модари Шокир Маҳкамов низ буд.
“Рӯзи ҷумъаи 8 ноябр ба мо гуфтанд, ки раис нест, номнавис мекунем, пагоҳ биёед. Боз рӯзи шанбе рафтем. Моро муовинаш қабул карда гуфт, ҳамаи гапҳоятонро ба раис мерасонем, тамом”,-афзуд Гулнора Рӯзиева. Вай дар идома гуфт, “духтарамро бояд 13 ноябр аз бемористон ҷавоб диҳанд, аммо вай ба табобат ниёз дорад. Ман пеш дар як қаҳвахона кор мекардам ва дар як рӯз 25 сомонӣ даромад доштам. Ҳоло намедонам, чӣ кор кунам. Агар ба кор бароям, духтарамро кӣ нигоҳубин мекунад? Ин маъюб шудааст.”
Дар ҳамин ҳол, модари Шокир Маҳкамов низ аз амалкарди хонаводаи Амонуллои Ҳукуматулло барои табобати фарзандаш шикоят карда ва гуфт, “каме қарз гирифта писарамро оиладор карда будам. Ҳоло ҳамсараш ҳомиладор аст, қарзҳои тӯяшро наканда боз ба ин садама дучор шуд. Ду ҳафта зиёд мешавад, ки ба аёдати фарзандонамон намеоянд. 12 ноябр бояд Шокирро ҷарроҳӣ кунанд, барои доруҳояш маблағ лозим аст. Аз куҷо пайдо кунем?”
Модари Азиза ва Шокир мегӯянд, “хонаводаи Амонуллои Ҳукуматулло тавонистааст дасти писари худро дар Олмон табобат кунад, фарзандони моро ҳам баранд, табобат кунанд. Агар дар чунин шароит ба мо кумак накунанд, ба куҷое даркор бошад, рафта аз болояшон шикоят мекунем.”
Садамаи шаби 9 октябр, ки дар маркази шаҳри Душанбе иттифоқ уфтод, се кушта бар ҷой гузошт. Мақомот дар лаҳзаҳои аввал Асрор Ҳукумови 22-сола, бародарзодаи раиси ширкати Роҳи оҳанро, муттаҳами ин садама эълон карданд. Аммо баъдан гуфтанд, ин садама бо иштироки Расули Амонулло, писари 16-солаи Амонуллои Ҳукуматулло, рух додааст. Ҳоло мақомоти умури дохилӣ мегӯянд, нафареро бо ному насаби Умар Шарифов ҷустуҷӯ доранд, ки зоҳиран гунаҳкори қазия ӯ будааст.
Бо ин ҳол, ин садамаи маргбор дар ҷомеаи Тоҷикистон вокунишҳои мухталифро ба бор оварад. Дар пайи эълони номи Расули 16-сола дар ин садама аксҳои мухталифи ӯ бо мошини БМВ-яш дар шабакаҳои иҷтимоӣ пайдо шуда, хабари ба Олмон фирор кардани ӯ низ паҳн гардид. Аммо Амонуллои Ҳукуматулло ин ҳамаро иттиҳоми сохтаву бофта номида ва гуфт, расонаҳо дар мавриди садамаи шаби 9 октябр ахбори беасос ва носанҷида нашр мекунанд. Ахиран Иттифоқи касабаи роҳиоҳанчиён низ бо ирсоли номае ба нашрияи “Имрӯз News” гуфтааст, расонаҳо аз рӯи ғараз ба ин қазия обуранги сиёсӣ додаанд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |