Нозия, овозхони ҷавони тоҷик ва духтари шодравон Кароматуллои Қурбон, дар рӯзи мавлуди падараш бо “Озодагон” суҳбати кӯтоҳи видеоӣ анҷом дод. Ӯ гуфт, ҳарчанд 21 сол боз падараш миёни онҳо нест, аммо ҳар сол, 29 ноябр, ҷашни зодрӯзи падарашро таҷлил мекунанд ва хотираи ӯро гиромӣ медоранд.
НОЗИЯ: “Аз падарам хотираҳои зиёде дорам. Вақте аз кор бармегаштанд, давида ба оғӯшашон мерафтем ва дар ҳуҷраи кориашон якҷоя суруд мехондем. Он замон кӯдак будем ва падарам мегуфтанд, “духтарам хеле ба мусиқӣ шавқ дорад ва ҳатман скрипканавоз мекунаму ба Ҳинд мефиристам”. Хушбахтона, ин орзуи падарамро амалӣ гардонда тавонистам. Ифтихор мекунам, ки фарзанди чунин шахси бузург ҳастам ва кӯшиш мекунам мисли падарам барои Ватан ва мардумам хидмат намоям.”
Озодагон: Мегӯянд, ҳарчанд аз марги фоҷиабори Кароматуллои Қурбон 21 сол гузашта, вале наздиконаш ҷашни зодрӯзи ӯро таҷлил мекунанд...
НОЗИЯ: “Бале, ин рост аст. Мо ҳар сол зодрӯзи падарамро ҷашн мегирем. Субҳи барвақт манзили ӯро зиёрат мекунему дастаҳои гулро ба модари азизам месупорем. Рӯзи таваллуди Беназир, духтари Муҳаммадрафӣ ба рӯзи мавлуди падарам рост омадааст, ки баҳонае барои беҳтару хубтар ҷашн гирифтан ва ҷамъ омадан сари як дастархон аст.”
Озодагон: Ҳоло ба чӣ кор машғулед?
НОЗИЯ: “Айни ҳол пайи эҷоди сурудҳои тоза ҳастам ва клипҳои нав ба навор мегирам. Қарор аст, рӯзҳои наздик як консерт баргузор намоям. Нақшаҳо бисёранд ва муфассалтар дафъаи дигар бароятон хоҳам гуфт. Худо ҳофиз!”
Нозияи Кароматулло моҳи феврали соли 1988 ба дунё омада, ҳоло аз ҷумлаи овозхонҳои пешсафи эстрадаи тоҷик аст. Вай соли 2005 мактаби мусиқии ба номи Малика Собирова ва соли 2010 Консерваторияи шаҳри Деҳлии Ҳиндустонро хатм намудааст. Ҳоло дар гурӯҳи “Ориё”-и Кумитаи радио ва телевизиони назди ҳукумати Тоҷикистон фаъоият дорад.