Бозоров 9 500 $-и довталаби Донишгоҳи тиббиро барнагардондааст
Вазорати умури дохилии Тоҷикистон мегӯяд, алайҳи як сокини Душанбе, ки барои дохилшавӣ ба Донишгоҳи тиббӣ аз наздикони довталаб 9,5 ҳазор доллари амрикоӣ гирифтааст, парвандаи ҷиноӣ оғоз шудааст.
Тибқи иттилои ин ниҳод ба шуъбаи пулиси ноҳияи Исмоили Сомонӣ, Саидов Абдуҷаббор, соли таваллудаш 1974, сокини пойтахт муроҷиат намуда, арз доштааст, ки моҳи сентябри соли равон шаҳрванд Бозоров Тоҳир, соли таваллудаш 1971, истиқоматкунандаи Душанбе бо роҳи фиреб ба бовариаш даромада, аз ӯ барои ба Донишгоҳи тиббӣ дохил намудани духтараш 9500 доллари амрикоиро гирифта, то ҳол барнагардонидааст.
Манбаъ мегӯяд, айни ҳол аз рӯи ин ҳодиса барои қаллобӣ парвандаи ҷиноӣ оғоз шуда, тафтишоти пешакӣ идома дорад.
Ин дар ҳолест, ки дар арафаи имтиҳоноти дохилшавии имсола Убайдулло Қурбонов, ректори Донишгоҳи тиббии Тоҷикистон гуфт, афроди алоҳидае дар мавриди фасодкорӣ зимни қабули донишҷӯён ба донишгоҳи тиббӣ сару садоҳоро паҳн мекунанд ва имсол ставкаи дохилшавиро ба ин муассиса ба 25 ҳазор доллари амрикоӣ баровардаанд.
Қурбонов мегӯяд, ин кори дасти манфиатхоҳоне ҳаст, ки мехоҳанд зимни маъракаи қабули донишҷӯён ба донишгоҳ пул кор кунанд: “Агар довталаб 25 ҳазор доллари амрикоӣ дошта бошад, метавонад 5 маротиба донишгоҳро хатм намояд. Он маблағеро, ки ба ин нафарони манфиатхоҳ медиҳанд, метавонанд тариқи шартнома ба буҷаи донишгоҳ гузаронанд ва беягон мушкилӣ қабул хоҳанд шуд.”
Қурбонов таъкид намуд, ки аксари онҳое, ки ба миёнаравон пул медиҳанд, бо дониши худ, бе ягон мусоидати миёнаравон дохил мешаванд: “Ин миёнаравон вақте мебиёянд ва мебинанд, ки номи довталаб дар рӯйхати донишҷӯён аст, дарҳол занг мезананд ва мегӯянд, ҳамаи корҳо ҳаланд. Бисёранд, қиссаҳое, ки довталабон дохил намешаванд ва волидонашон назди ман омада мегӯянд, мо ба фалону фалон ҳамин қадар пул додем. Аммо мо намедонем, ки ин нафарон кистанд. Баробари ин вақте довталабон намегузаранд, ин миёнаравон ба ҳар зудӣ пули онҳоро намегардонанд. Чунин қиссаҳо бисёранд.”
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |