Се озмоишгоҳи «Вирусологӣ ва радиологӣ» дар Душанбе мавриди истифода қарор гирифтанд

Дар назди «Хадамоти назорати давлатии санитарию эпидемологӣ» озмоишгоҳҳои «Вирусологӣ ва радиологӣ» барои нахустин бор дар Тоҷикистон ба фаъолият шурӯъ кард.

---

Ин тасмим дар арафаи таҷлили иди касбии табибон, ки ҳамасола рӯзи 18-уми август қайд карда мешавад, бо дастури хукумати ҷумҳурӣ ва вазорати тандурустию академияи илмҳои  тиббӣ роҳандозӣ гардид. Наврӯз Ҷаъфаров, муовини сардори хадамоти назорати давлатии санитарию эпидемологӣ дар маросими кушодашавии ин ташхисгоҳҳо гуфт,    «озмоишгоҳи радиологӣ бо васоити замонавии ченкунӣ, афканишот-гаммаспектрометри истеҳсоли ширкати «Канберраи» ИМА муҷаҳҳаз мебошад, ки он бо барномаи замонавии компютерӣ таъмин карда шудааст». Гуфтанист, тавассути ин асбоб мутахассисони соҳа метавонанд миқдори афканишотро дар маҳсулоти гуногуни хӯрокворӣ, масолеҳи сохтмонӣ, оби нӯшокӣ муайян сохта бо ин амал амнияти санитарию эпидемологии аҳолиро қисман таъмин намоянд.

Манбаъ афзуд, озмоишгоҳҳои вирусологӣ бо асбоби ташхисии замонавӣ ТЗП муҷаҳҳаз гаштаанд, ки ин ба мутахассисон имконият медиҳад, ки ташхисро на танҳо дар доираи ҳуҷайра, балки дар доираи кислотаҳои нуклеинӣ гузаронанд ва бо ин амал мавҷудияти ин ё он намуди барангезандаҳои бемориҳои сироятӣ-вирусҳоро муайян намояд. Ҳамчунин қайд карда шуд, ки озмоишгоҳҳи тобеъи МНДСЭ-и  вилояти Хатлон, Суғд низ бо чунин асбоб муҷаҳҳаз гаштаанд.Қайд карда шуд, ки бо мақсади тайёр намудани мутахассисони варзида дар соҳаи амнияти радиатсионӣ ва омӯзиши кор дар асбобҳои замонавии ченкунии афканишот, барои таҳсил ба кишварҳои хориҷа аз ҷумла 2 нафар ба ҷумҳурии Украина, 3 нафари дигар ба ҷумҳурии Беларус сафарбар гардидаанд.  {jathumbnail off} Мӯҳр