Коршинос: “Новобаста аз талошҳои Кабирӣ бозорро мегиранд”
Ҳумайрои БАХТИЁР
Коршиносони мустақили тоҷик бовар надоранд, додгоҳи шаҳри Турсунзода барои ташхис ва муайян кардани арзиши бозори “Саховат”, ки ба хонаводаи Муҳиддин Кабирӣ -- раиси Ҳизби наҳзати исломӣ марбут аст, намояндагонро аз хориҷа даъват кунад. Парвиз Муллоҷонов, таҳлилгари тоҷик, дар сӯҳбат бо “Озодагон” гуфт, “мисоли одӣ метавонад қазияи Зайд Саидов бошад”.
Муллоҷонов дар идома афзуд, ҳатто коршиносони байналмилалӣ ҳам дар ин маврид метавонанд кори худро холисона анҷом надиҳанд: “Ин вобаста аз он аст, ки кадом тараф, яъне даъвогар ё ҷавобгар коршиносонро даъват мекунад. Миёни онҳо низ бовиҷдону бевиҷдонҳо зиёданд. Новобаста аз талошҳои Муҳиддин Кабирӣ ин бозорро мегиранд. Ин маълум аст.”
Пешниҳоди даъвати коршиносон аз хориҷа барои муайян кардани арзиши бозори “Саховат” аз сӯи Муҳиддин Кабирӣ дар мурофиаи рӯзи 10 апрел садо додааст. Бузургмеҳр Ёров, вакили мудофеи оқои Кабирӣ, гуфт, “коршиноси дохилӣ – Икром Кузиев ба муаяйн кардани арзиши бозори “Саховат” машғул буд. Аммо Кузиев шикоят кард, ки кори худро анҷом дода натавонист, чун якуним моҳ кам аст. Илова бар ин, додгоҳ фишор меовард, то ин коршинос корашро зудтар анҷом диҳад.” Дар ҳоле ки ба қавли вакили мудофеъ, барои дақиқ кардани арзиши ин бозор камаш 6 моҳ вақт зарур аст.
Дар оғози моҳи апрели соли ҷорӣ додгоҳи шаҳри Турсунзода бо даъвои Оҷонсии мубориза бо фасоди молӣ мурофиаи бозори “Саховат”-ро оғоз намуд. Оҷонсии зидди фасод гуфтааст, бозори “Саховат”, ки ба хонаводаи Кабирӣ тааллуқ дорад, ба далели камбуд дар санадгузорияш бояд аз соҳибмулкони феълияш гирифта шавад. Аммо Муҳиддин Кабирӣ зимни суханронии худ дар додгоҳ оғози парвандаро нисбат ба моликияти хонаводагиаш “супоришӣ” ва сиёсӣ” хонда буд.
Бузургмеҳр Ёров, вакили мудофеи Муҳиддин Кабирӣ, мегӯяд, мақомот намехоҳанд, бозорро тахриб кунанд, аммо мехоҳанд онро ғайриқонунӣ эълон карда, аз соҳибмулки феълиаш бигиранд. “Яке аз далели мақомоти ноҳияи Турсунзода ин буд, ки барои баргузории чорабиниҳои варзишӣ онҳо майдон надоранд ва дар ҳолатҳои зарурӣ аз майдонҳои хусусӣ иҷора мегиранд, ки пардохти маблағ барояшон вазнин аст. Муҳиддин Кабирӣ гуфт, агар мақомоти Турсунзода замин ҷудо кунанд, ӯ омодааст майдони варзиширо аз ҳисоби худ бунёд кунад. Вале инро рад карданд ва гуфтанд, ки ин бозор бояд ба ҳисоби давлат баргардонида шавад ва ҳар вақте имконият шуд, мақомот худ майдонро бунёд мекунад”,-илова кард Ёров.
Дар идомаи мурофиа Муҳиддин Кабирӣ гуфтааст, омодааст, маблағи иҷора барои чорабиниҳои варзиширо низ пардохт кунад, танҳо бар ивази тахриб накардани бозори “Саховат”, ки онҷо 700 нафар соҳибкор фаъолият дорад.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |