ВИДЕО: Боздошти раиси ҲНИТ дар Бадахшон ба иттиҳоми барангехтани адовати динӣ
Саодатшо Адолатов, раиси дафтари Ҳизби наҳзати исломии Тоҷикистон (ҲНИТ) дар Бадахшон, ба иттиҳоми барангехтани адовати динӣ миёни сокинон аз сӯи маъмурони амниятӣ боздошт шудааст. Тибқи иттилои як манбаи “Озодагон” дар Ванҷ, боздошти Адолатов рӯзи 14 апрел дар ҷамоати Язгулом сурат гирифта, эҳтимол ба зудтарин фурсат ӯро ба Хоруғ ва ё Душанбе интиқол бидиҳанд.
Оҷонсии иттилоотии миллӣ – “Ховар” навиштааст, Адолатов ба он гумонбар аст, ки гӯиё дар деҳаҳои Мотравн ва Вравзи ҷамоати Язгулом чандин бор ба таври оммавӣ ба таҳқири сокинони маҳаллӣ даст зада, фазои носолими якдигарбадбиниро ба вуҷуд овардааст. Ин оҷонсӣ менависад, гӯиё аз болои раиси дафтари ҲНИТ 30 тан аз сокинони ҷамоати Язғулом ба мақомот шикоят бурдаанд.
Яке аз суханрониҳои кӯтоҳи Саодатшо Адолатов дар ҷаласаи ҲНИТ (Аз бойгонии "Озодагон")
Дар пайи шикояти онҳо гӯиё ташхиси пешакии мутахассисони соҳаи диншиносӣ дар робита ба муҳтавои аризаи дастҷамъона ва баёноти сокинони деҳаҳои Мотравн ва Вравзи ҷамоати Язгулом нишон додааст, дар ҳаракатҳои Адолатов барангехтани кинаву адовати динӣ, инчунин, тарғиби бартарии шаҳрвандон аз нигоҳи муносибати онҳо ба дин дида мешавад.
Боздошти Саодатшо Адолатов дар ҳоле сурат гирифта, ки бист рӯз пеш дар нашрияи расмии ҳукумати вилояти Бадахшон ва рӯзи 5 апрел дар "Ҷумҳурият" бо имзои И.Мироҳаниев дар бораи ӯ мақолаи интиқодомезе ба нашр расида буд. Муаллиф ва 810 нафаре, ки гӯиё зери ин матлаб имзо гузоштаанд, Адолатовро барои бунёдӣ кардани ақидаҳои асримиёнагӣ ва ҳамнишиниаш бо Ҷумъаи Намангонӣ дар солҳои ҷанги дохилӣ муттаҳам кардаанд. "Ин шахс маломати ҳамроҳӣ бо Ҷумъабойи Намангонӣ - аҷнабии тоҷиккушро дошта, дар солҳои 1995-96 дар шаҳри Кобули Афғонистон дар ситоди Ҳаракати исломии Узбакистон ёру ёвари ин гурӯҳи қаттол будааст",-навишта шудааст дар матлаб.
Дар идомаи матлаб Саодатшо Адолатов барои ривоҷ додани арзишҳои барои диёри Ванҷ бегонаниз муттаҳам гардидааст. "Аз ин лиҳоз, тақозои мо аз Саодатшо Адолатов ин аст, ки ба хотири таҷзия накардани шерозаи ақидатии бошандагони водии Ванҷ аз вазифаи ҳубобӣ ва хасакии раисии бахши ҲНИТ дар ВМКБ даст кашад",-таъкид шудааст дар матлаби Мироҳаниев.
Адолатов моҳи августи соли гузашта раиси дафтари ҲНИТ дар Бадахшон интихоб шуда, дар ин мақом Муслима Броимшоеваро иваз карда буд. То нооромиҳои тобистони соли 2012 дар Хоруғ ин мақомро марҳум Сабзалӣ Ризоев бар ӯҳда дошт. Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |