23 окт 2014 11:50Тоҷикистон / Иҷтимоӣ / Видео

(ВИДЕО) Таҳдиди афғонҳо ба Назриевҳо: Ҳамаатонро мекушем!

Пайвандони Ҳотамхон Назриев, сокини 22 солаи деҳаи Овиёи ноҳияи Шӯрообод, ки ҳудуди 3 моҳ қабл аз ҷониби силоҳбадастони афғон рабуда шуд, изҳор медоранд, аз сарнавишти ӯ бехабаранд ва худашон низ пайваста таҳдид мешаванд.

Аҳмад Назриев, бародари Ҳотамхон Назриев дар суҳбат ба “Озодагон” изҳор дошт, қаблан мақомоти афғон аз боздошти 4 нафар бо иттиҳоми гаравгонгирии ҷавони тоҷик хабар дода, гуфтанд, Ҳотамхонро баъди додани шоҳидӣ алайҳи онҳо ба Тоҷикистон интиқол хоҳанд дод: “Хешовандонамон дар Афғонистон ба мақомоти амнияти ин кишвар аз рабуда шудани Ҳотамхон хабар дода буданд ва дар пайи муроҷиати онҳо гаравгонгирон дастгиру бародарамон аз дасти онҳо раҳо шуд. Мақомоти афғон ваъда додаанд, ки Ҳотамхон то анҷоми мурофиаи додгоҳии гаравгонгирон дар Афғонистон мемонад, баъдан ӯро ба Тоҷикистон сиҳату саломат бармегардонанд. Аммо ҳоло гуфта мешавад, муттаҳамон дар гаравгонгиро раҳо кардаанд, вале аз бародари мо ҳеч хабаре нест.”

Аҳмад Назриев афзуд, яке аз муттаҳамони раҳошуда Одинаи Валад ном силоҳбадасти афғон аст, ки феълан ба онҳо занг зада, таҳдиди куштор мекунад: “Одина доим ба хонаводаи мо занг зада мегӯяд, шумо моро шарманда кардед, ба амнияти Афғонистон хабар додед, бинобар ин шуморо мекушем”.

Мусоҳибамон қайд намуд, барои баргардонидани бародараш аз Афғонистон ба Ватан борҳо ба мақомоти умури дохилии Шӯрообод муроҷиат кардаанд, вале ҳеч хабари дақиқе намегӯянд: “Пурсон мешавем, баъзан мегӯянд, бармегардад ва баъзан вақт аз бозгашти ӯ ва дар чӣ ҳол буданаш изҳори бехабарӣ мекунанд”.

Ин дар ҳолест, ки қаблан мақомоти Тоҷикистон аз раҳо шудани Ҳотамхон Назриев аз дасти афғонҳо ва ба Ватан баргаштани ӯ хабар дода буданд, вале наздикони Ҳотамхон мегӯянд, ӯро ягон бор ба Ватан наовардаанд.

Аҳмад Назриев, мегӯяд, гаравгонгирон дар ҳоле аз онҳо 30 ҳазор доллар барои баргардонидани бародараш талаб намудаанд, ки вазъи зиндагияшон хуб нест ва дар пайи омадани сел манзили истиқоматияшон дар деҳаи Овиё хароб шуда, ҳоло дар хонаи иҷора зиндагӣ доранд.

Пайвандони Ҳотамхон Назриев мегӯянд, аз мақомотҳои дахлдори Тоҷикистон, аз қабили Вазоратҳои умури дохилӣ ва хориҷӣ, Кумитаи амнияти милии кишвар хоҳиш доранд, барои пайдо ва сиҳату саломат баргардонидани фарзандашон аз Афғонистон ба онҳо кӯмак намоянд.

Ин аввалин ҳодисаи гаравгонгирии сокинони Шӯрообод аз сӯйи афғонҳо набуда, дар гузашта ҳам чунин ҳодисаҳо иттифоқ афтода буданд.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд:

ваа

Хамин Хотамхонро барои чи ба гарав гирифтаанд? Чи бизнес дошт бо афгонхо?

Ҷавоб диҳед Иқтибос Шикоят

нурулло

Ин сархади мо сохиб надошта бошад, ки афгонхо омада шахрвандони моро мебаранд, кани сархадчихо, кани КДАМ аз руи хабархо афгонхо дар дехахои назди сархади озодона рафту омад мекунанд агар дурурст бошад ин як бесохибии мо мардуми одди мебошад

Ҷавоб диҳед Иқтибос Шикоят

Эзоҳ илова кунед