29 окт 2014 10:08Тоҷикистон / Иқтисодӣ

Doing Business 2015: Тоҷикистон 11 қадам пеш рафтааст

Бонки ҷаҳонӣ дар гузориши ҷадиди худ, зери унвони “Пешбурди тиҷорат 2015” Тоҷикистонро миёни 189 давлати дунё дар ҷойи 166-ум қарор додааст, ки нисбати соли гузашта 11 зина пештар аст. Дар гузориши пешбурди тиҷорат барои соли 2014 Тоҷикистон дар зинаи 177 қарор доштааст.

Гузоришгарони Бонки ҷаҳонӣ зимни раддабандӣ, 10 нишондод, аз ҷумла сабти корхона, гирифтани иҷозатнома барои сохтмон, таъминот бо барқ, сабти моликият, қарзгирӣ, ҳимояи сармоягузор, андозбандӣ, тиҷорати байналмилалӣ, таъмини иҷрои созишномаҳо ва ҳалли муфлисшавиро ба назар гирифтаанд.
Бонки ҷаҳонӣ таъкид мекунад, ки оғози тиҷорат дар Тоҷикистон нисбат ба соли гузашта мушкилтар шуда, аз зинаи 96 то ба 106 поин рафтааст. Ҳимояи сармоягузорон низ заифтар гардида, аз зинаи 55-уми соли гузашта ба 56-ум фаромадаст. Дар масъалаи таъминот бо барқ Тоҷикистон нисбат ба соли қаблӣ се зина поин рафта, миёни 189 давлати дунё ҷои 178-умро гирифтааст. Пешрафти Тоҷикистон танҳо дар умури пардохти андозҳо, дастрасӣ ба қарзҳо ва сабти корхона ба қайд гирифта шудааст, ки мувофиқан дар зинаҳои 169, 116 ва 70-ум қарор гирифтааст.

Ҳамчунин Тоҷикистон аз нигоҳи ислоҳот дар гузориши ҷадиди Бонки ҷаҳонӣ аз пешсафон дар ҷаҳон арзёбӣ мешавад, ки қонунҳои хубро барои пешбурди соҳибкорӣ қабул кардааст. Аммо ҳолдонҳо мегӯянд, мушкил дар он аст, ки бисёре аз қонунҳо рӯи қоғазанд ё тариқи тафриқаандозӣ, яъне на барои ҳама баробар татбиқ мешаванд.

Дар сархати ин гузориш, ки тайи 12 соли охир таҳия мегардад, имсол Сингапур, Зеландияи нав, Ҳонгконг, Дания, Кореяи Ҷанубӣ, Кореяи ҷанубӣ, Норвегия, ИМА, Британия, Финландия ва Австралия қарор гирифтаанд.

Аз миёни кишварҳои собиқ шӯравӣ Гурҷистон (15), Эстония (17), Латвия (23), Литва (24), Арманистон (45), Белоруссия (57), Молдавия (63 ), Қазоқистон (77), Озарбойҷон (80), Русия(92) Украина (96), Қирғизистон (102) ва Тоҷикистон ҷои 166-ро гирифтааст.

Мӯҳр

Хабарҳои монанд: