Бурду бохти семоҳаи Хадамоти гумрук таҳти роҳбарии Рустами Эмомалӣ
Хадамоти гумруки Тоҷикистон фаъолияти се моҳи аввалашро таҳти роҳбарии генерали 27-сола Рустами Эмомалӣ, писари раисиҷумҳури Тоҷикистон ҷамъбаст намуда, дастовардҳои нахустинро оммавӣ кардааст.
Тавре аз Хадамоти гумруки Тоҷикистон ба “Озодагон” иттилоъ доданд, Рустами Эмомалӣ барои бори аввал дар Хадамоти гумрук қабули кормандони нав ва ишғоли мансабҳои холиро тариқи озмун роҳандозӣ кардааст. Бо супориши Рустами Эмомалӣ дар Хадамоти гумрук “Комиссия оид ба гузаронидани озмун барои хизмат дар мақомоти гумрук” таъсис дода шудааст.
Дар мавриди мубориза бо қонунвайронкуниҳо дар худи Хадамоти гумрук манбаъ афзуд, ки шахсан Рустами Эмомалӣ дар натиҷаи санҷишҳои хизматӣ нисбати 27 нафар санади ҷазои интизомӣ имзо намудааст. Дар маҷмуъ нисбати 35 нафар корманди гумрук муҷозоти интизомӣ татбиқ гардидааст.
Манбаъ илова намуд, ки “дар 3 моҳ 1494 ҳодисаи қонуншикании гумрукӣ ошкор карда шудааст. Дар натиҷа 1216 нафар шахсони воқеӣ, ҳуқуқӣ ва мансабдор ба ҷавобгарии маъмурӣ кашида шуда, ба маблағи 991 ҳазору 260 сомонӣ ҷарима ситонида шуд. Маблағи умумии аз ҳисоби ошкор ва пешгирии ҳолатҳои ҳуқуқвайронкуниҳои гумрукӣ ситонидашуда 26 миллиону 421 ҳазор сомониро ташкил менамояд, ки нисбат ба ҳамин давраи соли 2013-ум 3 миллиону 270 сомонӣ зиёд мебошад.”
Ин дар ҳолест, ки дар семоҳаи аввал тиҷорати хориҷии Тоҷикистон коҳиш ёфта, ба 1 миллиарду 154 миллион доллари амрикоӣ баробар шудааст, ки ин нисбат ба ҳамин давраи соли 2013 ба маблағи 55,9 миллион доллар кам гардида, 95,4%-ро ташкил додааст. Бо вуҷуди ин Хадамоти гумрук таъкид мекунад, ки дар семоҳаи аввали соли 2014 нақшаи воридоти пардохтҳои гумрукӣ 7,7 миллион сомонӣ барзиёд иҷро шуда, ба буҷет 901,4 миллион сомонӣ ворид гардид.
Мӯҳр