Қабули ду пешниҳоди Кабирӣ ва ҳизбаш дар парлумон
Муҳиддин Кабирӣ, раиси Ҳизби наҳзати исломии Тоҷикистон (ҲНИТ) ва Маҷлиси Намояндагон, рӯзи 24 апрел тарҳи пешниҳодии ҳизбаш барои тағйири "Қонун дар бораи интихоботи Маҷлиси Олӣ"-ро дар парлумон муаррифӣ кард. Ин тарҳ, ба гуфтаи ӯ, аз 11 банду зербандҳо иборат буда, метавонад барои баргузории интихоботи озоду шаффоф ва иштироки баробари намояндагони аҳзоб дар ин маърака мусоидат намояд.
Вале Галина Рабиева, намояндаи Саркумитаи Маҷлиси Намояндагон, аз ин ҳисоб нуҳ пешниҳоди Кабириву ҳизбашро рад кард. Ӯ гуфт, аз тамоми пешниҳодҳои ҲНИТ ҳамагӣ дутояшро мепазиранд, ки якеи он баргардонидани гаравпулӣ ба номзад дар сурати гирифтани 10 дарсади овози мардум ва дигараш бо “ручка” пур кардани протоколҳо мебошад.
Аз ин пештар, Саркумитаи Маҷлиси Намояндагон ин тарҳро баррасӣ карда, мисли имрӯз аз 11 пешниҳод дутои онро қобили қабул дониста буд. Дар ҷаласаи рӯзи 24 апрели Маҷлиси Намояндагон вакилон болои баъзе аз бандҳои ин тарҳи пешниҳодии ҲНИТ, аз ҷумла иштироки муҳоҷирон ба ҳайси номзад дар интихобот баҳс карданд.
Муҳиддин Кабирӣ гуфт, ҳоло дар Русия беш аз якуним миллион шаҳрванди Тоҷикистон машғули кору зиндагиянд ва ҳақ доранд, ки ҳамчун номзад дар интихоботҳо иштирок кунанд. Дар ҳоле ки ба гуфтаи ӯ, қонунҳои Тоҷикистон инро иҷоза намедиҳанд. Вале Шукурҷон Зуҳуров, раиси палатаи поёнии парлумони Тоҷикистон, гуфт, бар асоси иттилои расмӣ ин 800 ҳазор аст, на якуним миллион муҳоҷир. Баъдан, ба қавли ӯ, “набояд дар масъалаи муҳоҷирон воҳима кард”, чун то ҳол касе монеи онҳо нашуда, ҳаққашонро низ поймол накардааст.
Мӯҳр