23 фев 2015 16:49Тоҷикистон / Иҷтимоӣ / Видео

ВИДЕО: “Ҳамнишинӣ”-и бабрҳои нодири барфӣ дар Рӯзи ошиқон дар Дарвоз

Сомонаи National Geographic навори нодири “ҳамнишинӣ”-и бабрҳои барфии камёфтро нашр намудааст, ки аз ҷониби пажуҳишгарони тоҷик 13-уми феврали соли равон, дар арафаи Рӯзи ошиқон дар Тоҷикистон сабт гардидааст.

Татяна Розен Мичел, хатмкардаи донишгоҳи Ҳарвард ва чанд донишгоҳи дигари бонуфузи ҷаҳон, ки ба омӯзиши масоили олами вуҳуш машғул аст, бо пешниҳоди ин навор аз беҳтар шудани шароити зист дар Тоҷикистон барои бабрҳои нодири барфӣ тавсиф кардааст.

Ӯ мегӯяд, соли 2015, ки соли ҷаҳонии ҳифзи бабрҳои барфӣ эълон шудаст, дар ин ҷода як соли бабарор хоҳад буд ва зикр кардааст, ки дар арафи Рӯзи ошиқон, 13-уми феврал дар минтақаи Дарвоз пажуҳишгарони тоҷик боз ду бабри барфиро ба навор гирифтаанд, ки хеле нодир мебошад. Ба навиштаи Татяна Розен Мичел талоши мақомоти Тоҷикистон барои ҳифз ва зиёд кардани саршумори пармашохҳо низ метавонад, барои зиёд шудани саршумори бабрҳои барфӣ мусоидат намоянд. Ӯ таъкид намудааст, ки ҳадафашон дар Тоҷикистон моил кардани аҳолӣ барои ҳифзи олами вуҳуш, аз ҷумла бабрҳои барфӣ аст, ки ҳанӯз ҳам шикори ғайриқонунии онҳо аз ҷониби қочоқчиён идома дорад.

Ин олими ҷаҳонӣ бо такя ба навори пажуҳишгарони тоҷик, ки дар минтақаи Дарвоз сабт шудааст, таъкид мекунад, ки феълан мавсими бордоршавии бабрҳои барфӣ идома дорад: “Мавсими бордоршавии бабрҳо моҳи январ оғоз шуда, то миёнаҳои моҳи март идома меёбад. Дар ин мавсим бабрҳои модинаю нарина якҷоя мегарданд ва пас аз бордоршавӣ ҳар як онҳо боз ҳаёти алоҳидаи худро пеш хоҳанд гирифт. Бабри модина баъди 93-110 рӯзи бордоршавӣ, моҳҳои июн-июл таваллуд мекунад ва одатан фарзандонашро дар ғорҳои хеле бехатар ҷой мекунад”.

Дар ҳоле, ки навори бабрҳои барфӣ ҳатто дар алоҳидагӣ хеле кам аст, "National Geographic" видеои “ҳамнишинӣ”-и онҳоро дар Дарвоз нашр кардааст: