Қаноат дар бораи хушомадзанӣ, бадномкунандаҳои Ислом ва покии Зардуштия
Муъмин Қаноат, шоири маъруф ва раиси пешини Иттифоқи нависандагони Тоҷикистон дар маҳфили “Гуфтугӯи тамаддунҳо” аз раванди ба зардуштӣ маҳкум кардани афроде, ки аз покии Зардуштия суҳбат мекунанд, интиқод намуда, афзуд, бархе уламои дур аз ҳақиқати Қуръон дар ҷаҳони муосир монеи ба ғояи пешбарандаи ҷомеа табдил ёфтани Ислом шудаанд.
Муъмин Қаноат дар ин маҳфил таҳаммулпазирӣ ва гуфтугӯи фарҳангҳоро зарур хонда афзуд, бояд ба нерӯ ва фарҳанги гузаштаи худ такя кунем, ки озмунҳои гуногуни таърихро гузаштаасту то имрӯз барҷой аст: “Ҳамон роҳи таҳаммулпазирию ҳақиқатпарастию покию оини ростии Зардуштия. Ҳоло ҳар гоҳ аз Зардушия сухан мекунанд гумон мекунанд ба дини зардуштӣ гаравидааст. Вуҷуд надорад дини зардуштӣ. Ин мерос, фарҳанг ва таърихи мо аст, ки онро бояд истифода кунему ҳифз кунем. Ин дин дигар аслан вуҷуд надорад, ба ҷуз як гуруҳи маҳдуд дар Бомбай, ки ба доираи худ касеро роҳ намедиҳанд”.
Ин шоири маъруф таъкид намуд, дин метавонад нақши ғоя ё идеяи пешбарандаи миллатро бозӣ кунад: “Аммо баъзе уламои ифротию тафриқаандоз, ки аз доираи ҳақиқати Қуръон, маърифати Қуръон берун ҳастанд, бо ҳаракатҳои ба ном исломияшон динро бадном карданд. Дин метавонад ғояи пешбаранда бошад, барои ин уламои олим заруранд. Бояд ифроту тафритро аз ҷаҳонбинии Ислом аз байн бурд. Низоъҳои динӣ, ту шиаю ту суннию ту фалону ту фалонро бояд аз байн бурд”.
Собиқ раиси Иттифоқи нависандагон бори дигар зарурати ваҳдату таҳаммулпазиро таъкид намуда, илова кард, бо роҳи ҷанг то ҳол ягон масъала дар ҷаҳон ҳал нашудааст. Ӯ Афғонистони ҷангзадароро мисол овард, ки ба майдони озмоиши силоҳҳои гуногун аз ҷониби абарқудратҳо табдил ёфтааст: “Мақсад аз ин гуфтаҳо он аст, ки бояд андеша кунем, ки дӯсти мо кисту душмани мо кист? Оё дӯст дорем мо? Агар надошта бошем, худамон дӯст шавем бо ҳам. Илоҷи дигар нест. Нерӯҳоро ба ҳам муттаҳид кунем, ваҳдати дохилӣ эҷод кунем, ки зери назорати кулли нерӯҳо, ҳизбҳо зиёиҳои озодандеш бошад”.
Муъмин Қаноат инчунин аз азми мақомоти Тоҷикистон барои бунёди рамзи “Ваҳдати миллӣ” дар шаҳри Душанбе истиқбол карда, аз тарҳе, ки дар он президент дар ошёнаи якум бо телефон суҳбат мекунад, интиқод намуд: “Ман рӯирост ба таҳиягарони ин лоиҳа гуфтам, ки хушомадзанӣ акнун то ин дараҷа нашудагист”.
Ӯ афзуд, дар лоиҳаи рамзи “Ваҳдати миллӣ” аз ҷониби ӯ ва гуруҳи зиёиёни дигари тоҷик пешниҳод шудааст, қисмати тасвирии гардон низ ҷой дорад, ки дар он аксҳо аз гузашта ва инчунин аксҳои ҳамаи дастандаркорони истиқрори сулҳ дар гардиш хоҳанд буд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |