22 май 2015 16:45Хабарҳои ҷаҳон / Сиёсат

Сорос: Ҷанги сеюми ҷаҳон байни ИМА ва Чину Русия мешавад

Ҷорҷ Сорос, миллиардери таъсиргузор дар сиёсатҳои ИМА эҳтимоли шурӯи Ҷанги сеюми ҷаҳонро тахмин зада, гуфтааст, оғозаш низоъҳо миёни ИМА ва Чин мебошанд. Дар ин бора пойгоҳи Market Watch иттилоъ медиҳад.

Аз нуқтаи назари Сорос, амалӣ шудани чунин як тарҳ имконпазир аст, агар Чин иқтисоди худро ба ниёзҳои дохилӣ равона кунад, на ба содирот. Дар ин сурат ҳукумати Чинро зарурат пеш меояд, низои хориҷиро ба вуҷуд биоварад, то битавонад қудратро нигоҳ дорад.

Ин суханони Соросро расонаҳои русӣ иқтибос карда, аз қавли ӯ гуфтаанд, “Иттиҳоди Аврупо набояд аз ҷанги сарди нав бо Русия битарсад”.

“Агар бархӯрд миёни Чин ва шарикони низомии ИМА, мисли Ҷопон иттифоқ биуфтад, муболиға намешавад, агар бигуйем, ки дар садади ҷанги сеюми ҷаҳон қарор дорем”,- меоварад аз қавли Сорос Market Watch.

Барои раҳоӣ аз ин, ба ИМА зарур аст, ба Чин “гузашти бузург” бикунад: “Имкон бидиҳад, то юан (воҳиди пули Чин) ҷузъе аз сабади арзии Сандуқи байналмилалии пул бигардад. Дар ин сурат, арзи чинӣ метавонад, рақиби ҷиддии доллар гардад”.

Ба иддаои ӯ, Чин дар посух ба ин гузашти ИМА, метавонад гузашт кунад, ки ба ислоҳоти иқтисод марбут аст. Ба назари Сорос, ба Чин ва ИМА бисёр мушкил аст, ки ба тавофуқ бирасанд, зеро барои якдигар рақибони “бисёр нохушоянд”-анд.

“Дар сурати баръакс таҳдиди ҷиддие вуҷуд дорад, ки Чин бо Русия иттиҳоди сиёсиву низомӣ тасис медиҳад ва он замон хатари ҷанги нави ҷаҳонӣ воқеитар мешавад”,- хулоса кардааст Ҷорҷ Сорс.

Ҷорҷ Сорос, сармоядори амрикоӣ, асосгузор ва раиси фондҳои хайриявист, ки борҳо барои ташкил ва маблағгузории тағйири қудрат дар кишварҳои гуногун гунаҳкор дониста шудааст. Расонаҳои русӣ ба ин боваранд, ки бо маблағгузории Сорос аввалин “инқилоби норинҷӣ”-и Укроин дар соли 2004 ва аврумайдони соли 2013 роҳандозӣ шудаанд. Худи Сорос ин нуқтаназарҳоро инкор намекунад, моҳи майи 2014 изҳор дошта буд, “бунёди ӯ то кунун дар ҳаводиса рухдода нақши меҳварӣ дорад”.

Сорос аз ҷониби Русия ва кишварҳои пасошӯравӣ ба сифати як зидирусиягии сарсахт шинохта мешавад. Хабаргузории “Россия сегодня” гуфтааст, “агар суханони Сорос воқеият дошта бошанд, пас Маскав шарики аслии сиёсиву низомии Чин хоҳад шуд”.

Мӯҳр

Хабарҳои монанд: