Коммунистҳои рус хостори ҷорӣ гардидани виза бо Тоҷикистон шудаанд
Валерий Рашкин, муовини раҳбари Ҳизби коммунисти Русия ва Сергей Обухов, дабири ин ҳизб, дар як муроҷиатнома аз Хадамоти федеролии муҳоҷират ва Хадамоти федеролии марзбонӣ дархост кардаанд, бо кишварҳои Осиёи Миёна низоми раводид ҷорӣ кунанд.
Ба бовари онҳо, бештари муҳоҷирон аз кишварҳои Осиёи Миёна ба Русия ворид мешаванд ва низоми раводид кори онҳоро ҷиҳати пешгирии вуруди аъзои гуруҳи “Давлати исломӣ” осон мекунад.
Дар муроҷиатномае, ки унвонии Константин Ромодановский, раҳбари Хадамоти федеролии муҳоҷират ва Владимир Кулишов, раҳбари Хадамоти федеролии марзбонӣ ирсол шудааст, дархост шуда, дар марзҳои Тоҷикистон, Қирғизистон, Узбакистон ва Туркманистон тафтишоти иловагии муҳоҷирон дар мавриди робита доштани онҳо ба гуруҳи “Давлати исломӣ” гузаронида шавад.
Валерий Рашкин, дабири Ҳизби коммунисти Русия, муроҷиати ҳизбашро ба мақомот чунин шарҳ додааст: “Мо мардуми Осиёи Марказиро эҳтиром дорем. Ба раҳбарони диние, ки ҳамеша ба муҳоҷирон мефаҳмонанд, ки фаъолиятҳои террористии ДИИШ аз нигоҳи Қуръон қобили қабул нест, эҳтироми хоса дорем. Аммо, террористон барои мағзшӯӣ ва ҷалби шаҳрвандони кишварҳои номбурда имкониятҳои бештар доранд ва дар ин замина муваффақ шудаанд”.
Ин вакилони парлумон гуфтаанд, ҷангҷӯён ҳамеша талош доранд, дар Русия нуфуз пайдо кунанд, аммо ҳоло боло рафтани таваҷҷуҳи ҷангҷӯён ба шаҳрвандони Эрон, Сурия ва дигар кишварҳои ин минтақа, чашми онҳоро аз Русия дур кардааст: “Ба ин хотир, террористҳо метавонанд шаҳрвандони кишварҳои дигарро мағзшӯӣ кунанд ва ба чанд далел метавонанд дар Осиёи Марказӣ ба муваффақият бирасанд”.
Онҳо сатҳи баланди муҳоҷират ба Русия, низоми бидуни раводид ва вазъи мушкили иқтисодии кишварҳои Осиёи Марказиро аз муҳимтарин далелҳои муваффақ шудани террористон дар Осиёи Марказӣ донистаанд.
Ин пешниҳоди коммунистони рус дар ҳолест, ки ахиран нашрияи “АиФ” низ пешниҳод кард, Русия бояд бо Тоҷикистон низоми раводид ҷорӣ кунад. Аммо Худобердӣ Холиқназаров, раиси Маркази тадқиқоти стратегии Тоҷикистон, зимни як нишасти хабарӣ ҷорӣ шудани низоми раводид миёни Русияву Тоҷикистонро номумкин хонд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |