29 июл 2015 11:47Тоҷикистон / Иқтисодӣ

Умед Давлатзод дар бораи содироти маҳсулоти корхонаҳои Тоҷикистон ба хориҷи кишвар (ВИДЕО)

Вазорати рушди иқтисод ва савдои Тоҷикистон мегӯяд, чор корхонаи фаъол дар минтақаи озоди иқтисодии Суғд ба содироти маҳсулоташон ба хориҷи кишвар шурӯъ кардаанд.

Умед Давлатзод, муовини вазири рушди иқтисод ва савдо дар нишасти хабарие чоршанбеи 29 июл гуфт, ин корхонаҳо маҳсулоти худро асосан ба ҳамсоякишварҳои Афғонистону Қирғизистон содир мекунанд: “Стар-Пласт” қуттӣ ва қубурҳои пластикиро ба Қирғизистон содир мекунад. Хокаҳои сохтмонӣ ва рангу бори "Силкоат-Бойя", ширкати муштараки Тоҷикистону Туркия ба Қирғизистон, Афғонистон, Қазоқистон ва Русия интиқол мешаванд. Дар шаш моҳи ахир ин ширкат ба маблағи қариб ним миллион доллар маҳсулот содирот кардааст. “Тоҷ-проф” ба маблағи 121 ҳазор доллари амрикоӣ профилҳои алюминиро ба Қирғизистону Афғонистон иниқол додааст. “Реал” ба маблағи наздики 200 ҳазор доллар ба Узбакистону Қирғизистон маҳсулоти содиротӣ истеҳсол кардааст”.

Оқои Давлатзод мегӯяд, феълан се минтақаи озоди иқтисодии кишвар -- Суғд, Данғара ва Панҷ бо иҳотабандӣ таъмин гашта, гузаргоҳҳои гумрукии онҳо фаъол шудаанд: “Тасмим доштем, гузаргоҳи гумрукии минтақаи озоди иқтисодии Ишкошимро моҳи оянда мавриди истифода қарор диҳем, вале мутаасифона офатҳои табиии ахир ин корро ба таъхир андохт”.

Ба гуфтаи муовини вазири рушди иқтисод ва савдо минтақаи озоди иқтисодии Данғара ба таври намоён суръати рушд дорад, ки дар нимсолаи аввали соли ҷорӣ санги асоси се корхонаи дигар дар ҳудуди он гузошта шуд: “Дар назар аст, бо амалӣ гаштани ин се лоиҳа ҳудуди 5 ҳазор ҷои нави корӣ ба вуҷуд биёяд”.

Умед Давлатзод афзуд, ҳаҷми сармоягузорӣ дар маҷмӯъ ба минтақаҳои озоди иқтисодӣ 98 миллион сомониро ташкил додааст.

ВИДЕОИ суҳбати Умед Давлатзод дар бораи минтақаҳои озоди иқтисодӣ

Мӯҳр

Хабарҳои монанд: