31 июл 2015 12:36Тоҷикистон / Рӯ ба рӯ

Палатаи ҳисоб: Президент аз “гумшавӣ”-и маблағҳои зидди СПИД нигарон аст

Дилмурод Давлатзода, раиси Палатаи ҳисоби Тоҷикистон мегӯяд, гумшавии маблағҳои грантии Бунёди глобалиро, ки барои мубориза зидди СПИД ба Кумитаи ҷавонон, варзиш ва сайёҳии кишвар ҷудо шудаанд, мавриди санҷиш қарор доданд.

Давлатзода имрӯз, 31-уми июл зимни нишасти матбуотӣ дар Душанбе гуфт, ин масъала боиси нигаронии раисиҷумҳури Тоҷикистон низ шуд: “Мо санҷиш гузарондем ва камбудиҳо дар ҳаҷми 92,7 ҳазор сомониро ошкор шуд. Як қисмаш барқарор шуд ва барои барқарор намудани қисмати боқимонда ба Додситони кул санад пешниҳод шудааст”.

Раиси Палатаи ҳисоб гуфт, бо натиҷаҳои санҷиши байналмилалӣ, ки камомад дар ҳаҷми 116 ҳазор доллари амрикоиро ошкор кардааст, шинос шуданд, аммо зимни санҷиш ҳамагӣ 92,7 ҳазор сомонӣ зарарро ошкор кардаанд: “Камомад асосан дар самти корҳои ташкилӣ тарғиботӣ барои ҷилавгирӣ аз афзоиши бемории СПИД ошкор гардид”.

Давлатзода бо ишора ба воқеияти Тоҷикистон илова намуд, ки харҷи ин маблағҳо алайҳи ҷилавгирӣ аз афзоиши бемории СПИД самараи хуб надода истодааст: “Аз хулосаи санҷишҳои байналмилалӣ ҳам бармеояд, ки чаро маблағҳо сарф мешаванду ин беморӣ ба ҷои он, ки кам шавад, зиёд шуда истодааст. Мо дар ин бора ба Кумитаи ҷавонон, варзиш ва сайёҳӣ низ тавсияҳои худро ироа кардем”.

Ин дар ҳолест, ки қаблан Дафтари бозрасии кулли Амрико (Office of Inspector General - OIG) эълон кард, аз 300 000 долларе, ки Бунёди глобалӣ тариқи Барномаи рушди Созмони Милал ба Кумитаи ҷавонон ҷудо кардааст, 116 726 доллари он тариқи сохтакорӣ ва тақаллуб харҷ шудааст. Дар пайи ин эълон Эмомалӣ Раҳмон -- раисиҷумҳури Тоҷикистон низ аз ниҳодҳои дахлдор дар мавриди харҷи 116 ҳазор доллар, ки барои мубориза алайҳи ВИЧ/СПИД ҷудо шудааст, шарҳ талаб кард.

Мӯҳр

Хабарҳои монанд: