45 гуруҳи Убайдуллоев барои мубориза бо фарҳанг ва тафаккури бегона
Маҳмадсаид Убайдуллоев, шаҳрдори Душанбе барои таблиғи сиёсатҳои пешгирифтаи Эмомалӣ Раҳмон, раисҷумҳури кишвар ва ҷилавгирӣ аз гароиши ҷавонон ба сафи гуруҳҳои ифротӣ 45 гуруҳи таблиғотӣ ташкил кардааст.
Шавкат Саидов, сухангӯи Убайдуллоев дар суҳбат бо “Озодагон” ҳадаф аз ташкили ин гуруҳҳои таблиғиро аз сӯи шаҳрдори пойтахт “баланд бардоштани маърифат ва донишҳои ҳуқуқии сокинон нисбати пешгирии таъсиррасонии фарҳанг ва тафаккури бегонаву иртиҷоӣ дар ҷомеа” арзёбӣ кард.
Ба гуфтаи ҷаноби Саидов, ин 45 гуруҳ дар чаҳор ноҳияи шаҳри Душанбе тақсим шуда, фаъолияти худро аз соати 18:00-и шоми 27 августи соли равон оғоз хоҳанд кард: “Раиси шаҳр роҳбарон ва ҳайатҳои гуруҳҳои таблиғотиро ба он ҳидоят намуд, ки дар партави амалисозии сиёсати созандаю бунёдкоронаи Президенти кишвар муҳтарам Эмомалӣ Раҳмон баҳри рушди бемайлони иқтисодию иҷтимоӣ ҷиҳати фароҳам овардани шароити зиндагии арзанда ва инкишофи озодонаи шаҳрвандони мамлакат дар асоси зиндагии қонунсолорӣ ва волоияти қонун, густариши соҳибкорию институтҳои шаҳрвандӣ, ки воқеан самараи интихоби роҳи эъмори давлати соҳибистиқлоли демократӣ, ҳуқуқбунёд ва дунявӣ мебошад, бобати баланд бардоштани маърифат ва донишҳои ҳуқуқии сокинон нисбати пешгирии таъсиррасонии фарҳанг ва тафаккури бегонаву иртиҷоӣ дар ҷомеа мулоқоту вохӯриҳоро мақсаднок ба роҳ монанд”.
Убайдуллоев дар ҷаласаи кории рӯзи 24 августи худ, ки бо иштироки роҳбарони сохтору идораҳои марбутаи дар марзи пойтахт фаъолиятдошта, олимону донишмандон ва мутахассисон баргузор шуд, яке аз сабабҳои гаравиши баъзе аз шаҳрвандони Тоҷикистон ба сафи ҳаракатҳои иртиҷоиро надоштани сатҳи зарурии донишҳои дунявию динӣ ва бетарафии ҷомеаву падару модарон хонда, гуфтааст: “Онҳо ба ваъдаҳои безаминаи мубаллиғони тамоюлҳои тундрав бовар намуда, гумоштагони бетақдир ва қурбонии бозиҳои тарҳрезишудаи геополитикӣ мегарданд”.
Убайдуллоев аз тамоми сокинони пойтахти Тоҷикистон даъват кардааст, “бидуни бетарафӣ, алайҳи дилхоҳ зуҳуроти номатлуби бегонаи фарҳангию адёнӣ, ки ғаразҳои рахнасозии суботу ҳамзистиро бо василаҳои гуногуни таъсиррасонии иттилоотӣ ҳадаф доранд, бо масъулияти томи ватанхоҳона тамоми нерӯ ва потенсиали мавҷудаи хешро сафарбар намоянд”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |