Тӯраҷонзода: 90-фойизи пахтаҳои сӯхтагиро барқарор мекунем

Ҳудуди 500 кипи пахта оташ гирифтааст, ки имкони коркарди дубораи онҳо то 90 дарсад мавҷуд аст.

---

Дар ин бора Ҳоҷӣ Акбар Тӯраҷонзода, сиёсатшиноси маъруф ва рӯҳонии шинохта, ки шаби гузашта корхонаи мутаалиқ ба ӯ, ба сӯхтор мувоҷеҳ гашт, ба хабаргузории «Озодагон» иттилоъ дод. Қаблан хабар дода мешуд, ки ҳар як кипи пахтаи оташгирифта 220-240 килограмм вазн доштанд. Тӯраҷонзода гуфт, пунбаи мазкур аз ду хоҷагии пахтакор харидорӣ гардида, дар сехи коркард қарор доштанд. «Хисороти пешакӣ тақрибан 1,5-2 тон пахтаи коркардшуда мебошад, ки масъулияти баргардониданаш ба зиммаи корхона аст. Тибқи шартнома он чизе ки дар дохили корхона аст, масъулияту  ҷавобгарии молиявияш  ба ӯҳдаи соҳибмулк мебошад»,- илова кард Ҳоҷӣ Акбар Тӯраҷонзода.

Тӯраҷонзода ҳамзамон гуфт, паҳлӯи мусбии қазия дар он аст, ки оташсӯзӣ дар анбори нахи тайёр сурат гирифтааст ва байни прессҳо  сухтагӣ нест.   «Ҳамаи инҳоро мо бояд аз сари нав коркард кунем. Шояд 1,5 ва ё ҳадди аққал 2 тон талафот шавад. Аммо ҳоло бидуни ҳисоби дақиқ чизе гуфтан наметавонам, баъди ба тарозу гузоштан маълум мешавад»,- идома дод ҳамсӯҳбатамон.

Барои коркарди 1 тонна пахта хоҷагиҳо ба корхонаи пахтатозакунӣ 90-95 доллари амрикоӣ маблағ пардохт мекарданд. Соли гузашта корхонаи шахсии Ҳоҷӣ Акбар Тӯраҷонзода 2400 тонна пахта харидорӣ   карда буд, аммо аз хоҷагиҳо ягон килограмм пахтаро барои коркард қабул накарда буд. То имрӯз ин корхона 2000 тонна пахта харида, 1000 тоннаи онро коркард кардааст.

Маврид ба ёдоварист, оташсӯзӣ дар корхонаи пахта воқеъ дар шаҳри Ваҳдат соати сеи шаби гузашта сурат гирифта, бар асари он ҳудуди 600 баста (кип)-и пахта сӯхта буд. Кормандони мақомоти интизомӣ дар ҳоли ҳозир  сабабҳои ҳодисаро таҳқиқ мекунанд.{jathumbnail off}

 

Мӯҳр