28 ноя 2015 10:34Тоҷикистон / Фарҳангу адаб

“Тоҷикистон буҷае надорад, ки аз Ҳолливуд филмро мустақим бихарад”

Аз соли 2016 дар фазои иттилоотии Тоҷикистон ду шабакаи нави телевизионӣ - “ТВ-Варзиш” ва “ТВ-Синамо” ба фаъолият шурӯъ хоҳад кард. Дар зимн “Озодагон” назари соҳибназаронро дар ин робита пурсид.

Нуриддин ҚАРШИБОЕВ, раиси Шӯрои ВАО-и Тоҷикистон

Таъсиси ду шабакаи нави телевизионӣ маблағи зиёд талаб мекунад. Ба андешаи ман, дар шароити буҳрони иқтисодии ҷаҳонӣ ин амал қобили қабул нест. Мақсад ғанӣ гардондани фазои иттилоотӣ ва пешниҳоди маводи пурмазмун дар соҳаи варзиш ва тарзи ҳаёти солим ва синамоҳои ҷолиб барои фароғати шаҳрвандон бошад, ин кор тавассути беҳтар ва пурсамар гардондани шӯъбаю саридораҳои шабакаҳои мавҷудаи телевизионҳои давлатӣ имконпазир аст.

Бобоҷони ШАФЕЪ, ҷомеашинос

Давлат барои ин шабакаҳо пул ҷудо кардааст. Модоме пул ҷудо шудааст, инҳо фаъолият хоҳанд кард. Албатта, дар шароити буҳронӣ ифтитоҳи ин гуна шабакаҳо ба манфиат нест. Тоҷикистон варзише надорад, ки 24 соат аз як шабака намоиш дода шавад. Филмҳо низ. Аз ду сар мо дар ҳамаи ин шабакаҳо такрор ба такрор филмҳои даҳҳо бор дидаро мебинем. Тоҷикистон буҷае надорад, ки масалан аз Ҳолливуд филмро мустақим харад, тарҷума кунад ва намоиш диҳад. Буҷае надорад, ки бозиҳои Барселонаву дигар тимҳоро мустақим намоиш диҳад. Ин бозиҳоро мустақим аз дигар шабакаҳо мебинанд ва такрорашро аз Тоҷикистон. Вале модоме ташкил карданд, шояд барномаҳои хуб доранд. Надошта бошанд, муваффақ намешаванд. Ба ҳар ҳол гуфтан барвақт аст, ки ин шабакаҳо чӣ шабакаҳое хоҳанд буд. На "Баҳористон" муваффақ шуд ба ҳадаф расид ва на "Сафина". Аммо ин дуро интизор шавем, ки чӣ хоҳанд кард.

Аҳмадҷони АМРИДДИН, истиқоматкунандаи пойтахт

Ба фикри ман ташкили телевизионӣ варзишӣ саривақтист, зеро имрӯз дар Тоҷикистон то ҷое рушди варзиш ба назар мерасад ва аксар дӯстдорони варзиш барои фаҳмидан ва тамошо кардани руйдодҳои варзишӣ дар кишвар имкони пурра надоранд. Дуввум ин ки барои рушди соҳа низ ин шабака то ҷое заруранд ва ҳам ба рушди варзиш замина мегузорад. Аммо дар мавриди “ТВ-Синамо” чизе гуфта наметавонам, зеро синамои мо то имрӯз рушд накардааст. Аввал худи соҳаро бояд рушд дод.

Мӯҳр

Хабарҳои монанд: