06 фев 2016 11:10Тоҷикистон / Иҷтимоӣ / Рӯ ба рӯ / Тема дня

Хадамоти алоқа аз мусодираи 9 ҳазор симкорт хабар дод

Хадамоти алоқаи Тоҷикистон мегӯяд, соли гузашта беш аз 9 ҳазор симкорти ғайриқонуниро аз дасти мардум мусодира кардааст.

Татяна Холмуродова, муовини раиси Хадамоти алоқа ҷумъаи 5 феврал дар суҳбат бо хабарнигорон гуфт, аз фурӯшандаҳои ғайриқонунии симкортҳо беш аз 11 ҳазор сомонӣ ба фоидаи давлат ситонидаанд ҷарима шуданд.

Ӯ гуфт, соли 2015 Хадамоти алоқа дар ҳамкорӣ бо дигар ниҳодҳои ваколатдор дар самти риояи талаботи фурӯши симкортҳо корҳои зиёде анҷом дод: “Хадамот 93 бозрасии ҳуҷҷатгузорӣ гузаронид ва барои содир намудани ҳуқуқвайронкуниҳои маъмурӣ 9 ҳазору 136 симкортҳоро мусодира намуд. Фурӯшандаҳо 11 ҳазору 360 сомонӣ ҷарима шуданд”.

Мусодираи ин миқдор симкортҳо дар ҳолест, ки 25 декабри соли гузашта Эмомалӣ Раҳмон, раисиҷумҳури Тоҷикистон аз тарҳи нави қонун “Дар бораи алоқаи барқӣ” ҷонибдорӣ намуд. Бар пояи ин тағйирот операторони мобилии кишвар ба сабти дубораи 7 миллион сим-корти қаблан фурӯхташуда уҳдадор мешаванд. Қаблан Мансурҷон Умаров, муовини аввали раиси Кумитаи давлатии амнияти миллии Тоҷикистон зимни муаррифии ин тағйирот дар парлумон гуфт, солҳои ахир дар кишвар бидуни пешниҳоди ҳуҷҷат беш аз 70 фоиз сим-кортҳои фаъоли операторони мобилӣ фурӯхта шудаанд. Ӯ гуфт, муайян шудааст, ки ҳатто аъзои созмонҳои экстремистӣ-террористӣ ва қочоқбарони маводи мухаддир аз симкортҳои беноми операторҳои мобилии Тоҷикисон истифода мебаранд. Умаров таъкид кард, ки ҳадафи қонуни мазкур ба танзим даровардани фурӯши симкортҳо ва ҷилавгирӣ аз симкортҳои ғайрирасмӣ мебошад. Ба қавли Мансурҷон Умаров, дар Тоҷикистон беш аз 7 милион симкорт ҳаст ва дар асоси тарҳи қонун соҳибони симкортҳо бояд аз нав онҳоро сабти ном кунанд.

Мӯҳр

Хабарҳои монанд: