19 май 2016 11:05Тоҷикистон / Иҷтимоӣ / Видео / Тема дня

Хоҷаҳақиқ. Деҳае, ки барқ, мактаб ва бунгоҳи тиббӣ надорад (ВИДЕО)

Як рустои ноҳияи Муъминобод 25 сол аст, барқ надорад. Мақомоти ноҳия мегӯянд, то се соли оянда ин мушкил рафъ хоҳад шуд.

Дар деҳаи Хоҷаҳақиқи ҷамоати деҳоти ба номи Нуралишо Назарови ноҳияи Муъминобод 12 хоҷагӣ зиндагӣ мекунад, ки нерӯи барқ надоранд. Ин русто аз маркази ноҳия ҳамагӣ дар фосилаи 3 километр ҷойгир аст.

Ба иттилои сокинони деҳа аз маскун шудани нахустин нафарон дар ин русто 25 сол гузаштааст ва дар ин давом онҳо барқ надоранд. Ин русто мактаб ва бунгоҳи тиббӣ ҳам надорад. Бошандаҳои деҳа ба хабарнигори “Озодагон” гуфтанд, фарзандонашон дар мактаб-интернати маркази ноҳия таҳсил мекунанд. “Зиёда аз 30 нафар дар ин мактаб-интернат мехонанд. Рӯзи шанбе як нафар рафта онҳоро ба деҳа меорад ва якшанбе дубора ба онҷо мебарад”,-мегӯянд сокинони Хоҷаҳақиқ.

Зикамоҳ Ҳалимова, як сокини деҳа мегӯяд, фарзандонашон замони дар хона будан дар равшании шамъ китоб мехонанд ва вазифаҳои худро омода мекунанд. Ӯ ҳамчунин гуфт: “Шароити зистамон вазнин аст. Обу ҳезумро бо хар мекашонем”.

Хонум Ҳалимова мегӯяд, бо далели набудани барқ ва надоштани радиову телевизион аз хабарҳои кишвар ҳам хеле дер огоҳӣ пайдо мекунанд.

Хоҷаҳақиқ ягона деҳае дар Муъминобод нест, ки мушкили барқ дорад. Бино ба иттилои дарёфтӣ дар ҳудуди ноҳия теъдоди чунин рустоҳо ба 20 мерасад. Аз ин миён чанд деҳа, бо шумули Хундегӣ, Чашмаи латиф, Хоки пир, Деғламон, Тамдара ва ғайра умуман барқ надорад, қисми бештар бо сабаби хароб шудани симчӯб, аз кор мондани трансформатор ва дигар омилҳо бо мушкили барқ мувоҷеҳанд.

Хайрулло Абдулоев, мувини раиси ноҳия оид ба иқтисод ва саноат дар суҳбат ба “Озодагон” гуфт, бар пояи як қарори ҳукумат дар назар аст то соли 2019 мушкили барқ дар тамоми минтақаҳои вилояти Хатлон ҳал шавад.