Ҷанозаи Султон Қувватов, райиси ҳизби то ҳол номнависнашудаи Тараққиёти Тоҷикистон дар оромгоҳи Сари Осиёи шаҳри Душанбе ба хок супорида шуд.
Бино ба қавли иштирокчиёни маросими дафн, дар вақти видоъ бо марҳум дӯстон, пайравон ва одамони касбу кори гуногун ҷамъ омада буданд.
Султон Қувватов пас аз бемории начандон тӯлонӣ дар сини 60-солагиаш субҳи имрӯз аз олам даргузашт. Номбурда 27-уми марти соли 1950 дар шаҳри Кӯлоб ба дунё омада, фаъолияти меҳнатиашро дар сафҳои милиса аз соли 1974 оғоз кардааст. Аз корманди қатории ВКД то ба ҳайси сардори шӯъбаи мубориза алайҳи ҷиноятҳои муташаккил (ОБХСС-и собиқ) омада расидааст. Аз соли 1992 то соли 1995 дар вазифаи сардори раёсати мубориза бар зидди ҷиноятҳои иқтисодии ВКД ифои вазифа дошт. Тайи солҳои 1995-1998 райиси Кумитаи давлатии андози назди ҳукумати ҶТ буд.
Соли 1999 Султон Қувватов барои дарёфти мақоми раёсатҷумҳурии Тоҷикистон вориди мубориза шуда буд, вале номзадии ӯро дар интихоботи президент ба қайд нагирифтанд. Пас аз нокомиаш дар сабқати мазкур ба таъсиси ҳизби мухолифи ҳукумат, ҳизби Тараққиёти Тоҷикистон иқдом кард. Аммо кӯшишҳои ӯ тайи 7 сол бенатиҷа анҷом ёфтанд. Аз соли 2005 ба ин сӯ аз сиёсати калон канор рафта, ба тиҷорат машғул буд.
Мӯҳр