Сипоси Зуҳуров ба Арабистони Саудӣ барои шароити шоистаи адои ҳаҷ
Шукурҷон Зуҳуров, раиси Маҷлиси намояндагон, палатаи поёнии парлумони Тоҷикистон ба ҳукумати Арабистони Саудӣ барои муҳайё намудани шароити шоиста ҷиҳати адои ҳаҷҷи фарзӣ ва умра изҳори сипос кардааст.
Муҳаммадато Султонов, сухангӯи Маҷлиси намояндагон ба “Озодагон” гуфт, изҳори ташаккури ҷаноби Зуҳуров дар мулоқот бо Абдуллоҳ ибни Муҳаммад ибни Иброҳим оли Шайх, раиси Маҷлиси Шӯрои шоҳигарии Арабистони Саудӣ садо дод. Раиси палатаи поёнии парлумони Тоҷикистон гуфтааст, “мо сипоси шаҳрвандони Тоҷикистонро, ки ҳарсол баҳри адои ҳаҷҷи фарзӣ ва умра мераванд аз шароити шоиста ба Ҳукумати Арабистони Саудӣ арз мекунем ва таъкид менамоем, ки ташаббуси Подшоҳи Арабистони Саудӣ – тарҳи тавсиаи навини Ҳарамайни Шарифайн ба нафъи дини мубини Ислом ва уммати Исломӣ мебошад”.
Раиси Маҷлиси намояндагон ба мушкили оби ошомиданӣ доштани Арабистони Саудӣ ва дорои захираҳои фаровони оби тоза будани Тоҷикистон ишора намуда, изҳор доштааст, ки ду кишвар метавонанд дар бахши содироти оби ошомиданӣ ҳамкорӣ намоянд.
Дар идома ҷаноби Зуҳуров қайд намудааст, ки соли гузашта ҳаҷми мубодилаи мол миёни ду кишвар ба 588 ҳазор доллар расид, ки ба имконияту иқтидорҳои мавҷудаи ду давлат ҷавобгӯ нест: “Мо пешниҳод дорем, ки бо кушиши ҳарду ҷониб барномаи ҳамкориҳо барои солҳои муайян (барои мисол 2016- 2021) таҳрезӣ шавад. Ба ҷуз ин баҳри тавсеаи ҳамкориҳои тиҷоратии байни ду кишвар таҳти сарпарастии сохторҳои иқтисодию тиҷоратӣ, сармоягузорӣ ва палатаҳои савдову саноат зарурати таъсиси Шӯрои доимо амалкунандаи соҳибкорони ду кишвар ва дар ин росто ба таври мунтазам доир намудани форумҳои иқтисодӣ, намоишгоҳҳои маҳсулоти кишоварзию саноатӣ ва дигар чорабиниҳои муштарак ба мақсад мувофиқ аст. Ҷониби Тоҷикистон аз ҷониби Саудӣ даъват менамояд, ки дар татбиқи лоиҳаи гидроэнергетикӣ, аз ҷумла сохтмони неругоҳҳои барқи обии хурду миёна дар дарёҳои дохилии Тоҷикистон ва сохтмони хатҳои интиқоли барқ иштирок намояд”.
Манбаъ меафзояд, Абдуллоҳ ибни Муҳаммад ибни Иброҳим оли Шайх дар навбати худ омодагии кишвари худро барои тақвияти равобит бо Тоҷикистон эълон дошта, таъкид намудааст, Арабистони Саудӣ талош мекунад, ки дар оянда муносибатҳои иқтисодиву кишоварзии Тоҷикистону Саудиро тақвият бахшад.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |