27 июл 2016 10:17Тоҷикистон / Иқтисодӣ

Акрамзода: Барои таъмини деҳқонон бо техника 4 миллиард зарур аст

Юсуф Акрамзода, раиси корхонаи давлатии “Тоҷикагролизинг” мегӯяд, барои таъмини пурраи кишоварзони тоҷик бо техника 4 миллиард сомонӣ зарур аст, ки корхонаашон чунин имкони молиро надорад.

Акрамзода имрӯз, 27-уми июл зимни нишасти хабарӣ дар Душанбе гуфт, дар шароити буҳроние, ки пеш омадааст, маълум нест, ки давоми чанд сол кишоварзони тоҷик пурра бо техника таъмин хоҳанд шуд. Ӯ афзуд, бо назардошти вазъи мушкили молӣ муҳлати баргардондани маблағи техника, ки баробари се сол буд, то 5-6 сол зиёд карда шуд. Раиси “Тоҷикагролизинг” ваъда дод, ки ҳаҷми маблағи пешпардохт барои техникаро аз 30 фоизи феълӣ поин хоҳанд бурд.

Қаблан раёсати “Тоҷикагролизинг” эълон кард, ки хоҷагии қишлоқи Тоҷикистон ба 29 ҳазор техника ниёз дорад, аммо амалан хоҷагиҳои кишвар 26 ҳазор техника доранд, ки 9 ҳазораш кор намекунад. Акрамзода аввали соли равон гуфт, аксари техникаҳои кишоварзӣ дар Тоҷикистон ба ном вуҷуд доранд. Ӯ афзуд, ки тибқи меъёр хоҷагиҳои кишоварзии Тоҷикистон бояд бояд 2 ҳазору 226 комбайн дошта бошанд: “Вале ҳозир дар хоҷагиҳо 1121 комбайн буда, 649 тоаш кор намекунанд. Комбайнҳои мавҷудаи коршоям 29 дарсади талаботро ташкил медиҳанд. Дигараш ба ном вуҷуд дорад”.

Тибқи иттилои “Тоҷикагролизинг” подошпулии лизинг 12 фоизи солон буда, аз арзиши боқимондаи техника ҳисоб карда мешавад: “Тоҷикагролизинг техника қарз медиҳад ва он дар хоҷагии деҳқонӣ нигоҳ дошта мешавад. То пурра иҷро шудани уҳдадориҳои шартномавӣ техника моликияти Тоҷикагролизинг аст ва баъди пардохти пурраи маблағ техника аз лизинггиранда мешавад”.

Мӯҳр

Хабарҳои монанд: