В.Мадаминов: Росселхознадзор дурӯғ мегӯяд

Ворис Мадаминов, сардори Хадамоти назорати давлатии фитосанитарӣ ва карантини растании Тоҷикистон, арқоми «Росселхознадзор» - ро, ки гӯё имсол 154 ҳолати риоя нашудани меъёрҳои фитосанитарии байналмилалӣ ва Русияро дар маҳсулоти Тоҷикистон ошкор кардаанд, қобили эътимод намеҳисобад.

---

Номбурда зимни сӯҳбат бо  хабарнигори «Озодагон» изҳор дошт, ки имрӯз ман ҳам метавонам, гӯям, садҳо ҳолати риоя нашудани меъёрҳои фитосанитариро дар маҳсулоти бағоҷи мусофирон ошкор кардаем: «Кӣ инро тафтиш мекунад? Русия бояд дар ҳолати ошкор шудани нақзи меъёрҳои фитосанитарӣ дар маҳсулоти Тоҷикистон моро огоҳ мекард. Дар сурати риоя нашудани меъёрҳои фитосанитарӣ, ҷониби Русия ҳуқуқ дорад, маҳсулотро дар ҷояш нобуд кунад. Аммо то имрӯз аз ягон ҳолати нест кардан, баргардондан ё риоя нашудани меъёрҳои фитосанитарӣ дар Тоҷикистон ба мо хабар надодаанд. Маҳсулоти Тоҷикистон бе монеаъ вориди бозорҳои Русия мегардид. Мадаминов афзуд: «Мегӯянд, 154 ҳолатро дар давоми 9 моҳи авали соли ҷорӣ ошкор кардаанд. Пас то ҳол, ки моҳи 11 –уми сол сипарӣ шуда истодааст, онҳо дар куҷо буданд ва чаро моро огоҳ накарданд?»

Ин дар ҳолест, ки як рӯз қабл Хадамоти назорати ветеринарӣ ва фитосанитарии Русия (Росселхознадзор), бо пахши изҳороти расмӣ Тоҷикистонро ҳушдор дод, ки дар сурати пурзӯр нашудани назорат аз болои меъёрҳои фитосанитарӣ дар кишвар, воридоти меваю сабзавоти кишварро ба ҳудудаш манъ мекунад.

Русия истеъмолкунандаи асосии меваю сабзавоти Тоҷикистон маҳсуб ёфта, тибқи иттилои расмӣ ҳудуди 75 фоизи меваю сабзавоти содиротии кишвар ба Русия раҳсипор мегардад. Коршиносон изҳороти  «Росселхознадзор» - ро давоми фишоровариҳои Русия ба Тоҷикистон медонанд, ки баъди равонаи зиндон шудани шаҳрванди ин кишвар, Владимир Садовничий, авали моҳи ҷорӣ оғоз гардид.

Мӯҳр