05 сен 2016 14:53Оcиёи Марказӣ / Узбакистон

(ВИДЕО) Чаро Гулнора Каримова дар ҷанозаи падараш набуд?

Гулнора Каримова, духтари бузурги Ислом Каримов, раисиҷумҳури Узбакистон дар маросими видоъ бо падараш ҳузур надошт. Баъди нашри аксу наворҳо аз ин маросим, ки 3 сентябр доир гардид, дар расонаҳо баҳси дар куҷо будани Гулнора гарм шуд. На хонаводаи Ислом Каримов ва на мақомоти расмии Узбакистон дар ин маврид ҳанӯз шарҳе надодаанд.

Бархе расонаҳо менависанд, Гулнора Каримова аз соли 2014 ба ин сӯ дар ҳабси хонагӣ қарор дорад. Хабари хабси хонагии ӯ баъди он расонаӣ шуда буд, ки Гулнора дар шабакаҳои иҷтимоӣ модар, хоҳараш Лола ва раҳбари хадамоти амниятии Узбакистонро танқид кард.

Хабаргузории “Фарғона” навиштааст, ҳанӯз Гулнора ҳамроҳ бо писараш Имон дар ҳабси хонагӣ буда, ҳатто ба интернет дастрасӣ надорад. Писари калонии Гулнора -- Ислом Каримови хурдӣ дар Лондон зиндагӣ мекунад ва бино ба иттилои расонаҳо дар ҷанозаи бобояш иштирок надоштааст. Ба тахмини пойгоҳи хабарии “Фарғона” бо ду далел Ислом Каримови хурдӣ дар ҷанозаи бобояш ширкат накардааст: “Ё ӯ аз бобояш барои корҳои бо модараш суратгирифта ранҷидааст ё ин ки ӯро нагузоштаанд ширкат бикунад”.

Гулнора Каримова ки духтари дӯстори Каримов гуфта мешуд аз поёни соли 2013 гирифтори мушкилот шуд ва расонаҳо дар мавриди ӯ хабарҳои зидду нақизе нашр мекарданд. Аз ҷумла мегуфтанд, сабаби ба ҳабс кашидани ӯ ин аст, ки вай муқобили падарш тавтеъа омода мекунад ва мехоҳад ба ҷойи падараш писари тағояш Акбар Абдуллоевро ба раёсати курсии раҳбарии Узбакистон биоварад. “Вақте Рустам Иноятов, раиси хадамоти амният ин иттилоъро ба Ислом Каримов мерасонад, ӯ хиёнати духтарашро нодида гирифта наметавонад”,-навиштааст пойгоҳи zanoza.kg.

Ба иддаои торнамои мазкур, дастури ҳасби хонагии Гулнораро худи Каримов додааст.

Расонаҳои ғарбӣ Гулнора Каримоваро яке аз пояҳои муқтадири фасод дар Узбакистон ва ҳукумати Ислом Каримов медонистанд. Расонаҳои маъруфи ғарбӣ сари ҳар вақт дороиҳои ӯро ҳисобу китоб мекарданд ва дар ҳамин рӯзҳои ахир, баъди марги падараш нашри “Ню-Йорктаймз” низ бори дигар рӯйхати дороиҳои Гулнора Каримоваро дар хориҷ аз Узбакситон нашр намуд.

Соли 2014 Бӣ-бӣ-Сӣ навореро нашр намуда буд, ки дар он Гулнора мегуфт ба ӯ “бадтар аз саг муносибат” мекунанд. Дар ин сабт ҳамчунин Гулнора гуфта буд, ба ёрии оҷили тиббӣ ниёз дорад.

Гулнора Каримова то оғози моҷарояш яке аз сарватмандони маъруфи Узбакистон буд, ки бо дипломи донишгоҳи Ҳарвард аз ҷумлаи овозхонҳо ва модели варзида дар Узбакистон дониста мешуд. Дар ин авохир дар интернет суруде ҳам нашр шуд, ки гуфта мешавад, онро Гулнора дар бораи Ислом Каримов сароидааст. Аммо коршиносон мегӯянд, ин таронаро духтари президент чанд сол қабл иҷро намуда буд, танҳо онро дар ин авохир клип карда, нашр кардаанд.