26 сен 2016 17:30Тоҷикистон / Иҷтимоӣ / Муҳоҷир / Тема дня

“Депресия”, сармозадагӣ,... – дардҳои асосии муҳоҷирон дар Русия

Олимони Донишгоҳи тиббии Новосибирск зимни як таҳқиқот муайян кардаанд, ки ҳар 10-умин муҳоҷири корӣ дар Русия гирифтори афсурдагӣ (депресия) мебошад.

Ин таҳқиқот миёни 1 ҳазору 597 нафар муҳоҷир аз Тоҷикистон, Узбакистон, Қирғизистон ва Қазоқистон гузаронида шудааст. Тибқи ин таҳқиқот 94 нафар муҳоҷири мавриди таҳқиқ гирифтори афсурдагии баланд буда, 80 нафар мубталои афсурдагии сабук мебошанд.

Ширкатҳои бимаи тандурустӣ изҳор доштаанд, ки танҳо 15 фоизи муҳоҷирон аз бимаашон истифода кардаанд, аммо тадриҷан теъдодашон рӯ ба афзоиш аст. Андрей Абрамов, муовини мудири кулли ширкати бимаи “ВСК” гуфтааст муҳоҷирон баробари шаҳрвандони Русия ба кумаки тиббӣ муроҷиат мекунанд. Ӯ гуфтааст муҳоҷирон бештар аз захму осеб, дарди шадиди дандон ва сармохӯрдагӣ шикоят мекунанд.

Соли 2015 ба ширкати “ВСК” 524 ҳазор муҳоҷир ва нимаи аввали соли ҷорӣ 330 ҳазор муҳоҷир муроҷиат кардааст. Бимаи ин ширкат барои 3 моҳ 340 рубл ва 12 моҳ 5,6 ҳазор рубл нарх дорад. Ширкати бимаи “Согалисие” гуфтааст муҳоҷирон дар аксарияти маврид бо осебдидагӣ, бемориҳои сироятӣ ва сухтагӣ муроҷиат мекунанд. Ин ширкат соли гузашта 10 ҳазор ва дар муддати 8 моҳи соли ҷорӣ 20 ҳазор муҳоҷир қабул кардааст. Бемории сил ҳам миёни муҳоҷирон зиёд мушоҳида мешудааст.

Олимони Донишгоҳи тиббии Смоленск 614 кӯдакро аз оилаҳои муҳоҷирон, ки солҳои 2014-2015 ба Русия омадаанд, ташхис кардаанд. Бештари волидайни ин кӯдакон аз Украина ва бахши дигар аз Тоҷикистон, Молдова, Узбакистон, Қазоқистон ва Қирғизистон ба Русия муҳоҷир шуданд.

Натиҷаи ин ташхис нишон додааст, ки 2,7 фоизи онҳо аз оилаи муҳоҷирон ва 0,3 фоиз аз оилаи шаҳрвандони Русия будаанд, ки бо гирифторони беморони сил робита доштаанд. 74 фоизи фарзандони муҳоҷирон ва 98 фоизи шаҳрвандони Русия аз эмгузаронӣ гузаштаанд. Ба ин тартиб пажуҳишгарон мегӯянд, бемории сил миёни муҳоҷирон нигаронкунанда боқӣ мондааст.

Мӯҳр

Хабарҳои монанд: