Медведев аз созишномаи нахуствазири Тоҷикистон пуштибонӣ кард

Дмитрий Медведев, президенти Русия, Созишнома оиди таъсиси минтақаи озоди тиҷоратӣ дар ҳудуди ИДМ - ро, ки Оқил Оқилов, сарвазири Тоҷикистон моҳи гузашта онро имзо намуда буд, тасдиқ карда, рӯзе пеш барои тасвиб ба парлумони Русия пешниҳод намудааст.

---

Дар ин бора Хадамоти матбуоти президенти Русия иттилоъ паҳн кардааст.Созишномаи таъсиси минтақаи озоди тиҷоратии ИДМ – ро,  санаи 18 –уми моҳи гузашта, дар баробари Оқил Оқилов, инчунин Владимир Путин, сарвазири Русия ва сарони ҳукуматҳои Қазоқистон, Украина, Беларус, Қазоқистон, Арманистон ва Қирғизистон имзо намуданд.  Мақомоти Ӯзбакистон, Туркманистон ва Озарбойҷон ваъда додаанд, ки то охири соли ҷорӣ мавқеъашонро нисбати таъсиси минтақаи озоди тиҷоратӣ дар ИДМ муайян мекунанд.

Масъулини Вазорати рушди иқтисод ва савдои Тоҷикистон дар сӯҳбат бо хабарнигори «Озодагон» таъсиси минтақаи озоди тиҷоратии ИДМ – ро ба фоидаи иқтисодиёти кишвар арзёбӣ карданд. Ба гуфтаи манбаъ, дар натиҷаи таъсиси минтақаи озоди тиҷоратӣ, баъзе намуди пардохтҳо зимни воридоту содироти мол бекор мешаванд, ки ин дар навбати ба афзоиши гардиши мол ва арзонӣ дар бозорҳои кишвар мусоидат мекунад.

Акнун ба гуфтаи Владимир Путин, сарвазири Русия барои амал намудани муқаррароти Созишномаи таъсиси минтақаи озоди тиҷоратии ИДМ зарур аст, ки парлумони кишварҳои узв онро ба тасвиб расонанд. Президенти  Русия якумин шуда, созишномаро барои тасвиб ба парлумон  пешниҳод кард. Ҳукумати Украина аз кишварҳои узви ИДМ даъват кардаст, ки корҳоро дар самти тасвиби созишнома вусъат диҳанд, то минтақаи озоди тиҷоратии ИДМ тавонад аз 1 –уми январи соли 2012 –ум фаъолият кунад.

Мӯҳр