МН ширкати «Барқи тоҷик» -ро аз пардохти 27,7 миллион озод кард

Парлумон имкон дод, ки ширкати «Барқи тоҷик» зимни воридоти 30 ҳазор тонна мазут, аз пардохти боҷи гумрукӣ, андоз аз арзиши иловашуда ва пардохтҳои аксизӣ озод гардад. Сафаралӣ Наҷмиддинов, вазири молияи Тоҷикистон ҳаҷми умумии пардохтҳоро, ки «Барқи тоҷик» аз амалӣ карданашон озод гардид, 27,7 миллион сомонӣ арзёбӣ карда, афзуд, ки мазути тариқи имтиёзнокворидшуда барои эҳтиёҷоти Маркази барқу гармидиҳии Душанбе сарф хоҳад шуд.

Масъулини ширкати «Барқи тоҷик» изҳор медоранд, ки аз 30 ҳазор тонна мазут, аллакай 5 ҳазор тоннааш ворид гардидаст. Ба гуфтаи манбаъ, рӯзҳои наздик 5 ҳазор ва дар моҳи декабр 10 ҳазор тонна мазути дигар вориди Тоҷикистон хоҳад шуд.  Воридоти 10 ҳазор тоннаи боқимонда моҳи январи соли оянда ба нақша гирифта шудааст.

Зимнан, раҳбарони «Барқи тоҷик» мегӯянд, сабукиҳои додашуда, барои кам кардани арзиши нерӯи тавлиднамудаи Маркази барқу гармдиҳии Душанбе мусоидат хоҳад кард.