Вазорати маорифи Тоҷикистон беҳтарин хобгоҳи донишҷӯёнро дар Душанбе қадрдонӣ кард

Тавре ба хабаргузории «Озодагон» аз вазорати маориф иттилоъ доданд, бо ташаббуси ин вазорат ва кумитаи иттифоқи касабаи кормандони маорифу илми кишвар озмуни «Хобгоҳи беҳтарин»-и муассисаҳои таҳсилоти олии касбии шаҳри Душанбе гузаронида шуда, рўзи 30-юми декабри соли 2011 ҷамъбаст гардид. Гурўҳи корӣ дар ҳайъати 7 нафар дар муддати беш аз ду ҳафта тавонист аз 25 хобгоҳ дидан намояд.

Манбаъ афзуд, тибқи хулосаи ҳайъати ҳакамон, ҷойи аввал насиби хобгоҳи № 7-и Донишгоҳи миллии Тоҷикистон гардид. Хобгоҳи №2-и ДДОТ ба номи С.Айнӣ ҷойи дувум ва хобгоҳҳои №2-и ДДТТ ба номи А.Сино ва №1-и Донишкадаи иқтисодии Тоҷикистон ҷойи сеюмро сазовор шуданд. Ғолибони озмун бо ифтихорнома ва тўҳфаҳои хотиравии вазорати маориф ва Кумитаи иттифоқи касабаи кормандони маориф ва илми Тоҷикистон қадрдонӣ гардиданд.

Ҳамчунин, ба 3 хобгоҳи донишгоҳҳои тиҷорат, технологӣ ва санъат барои иштироки фаъолона ифтихорномаҳо тақдим карда шуд. Санҷиш нишон дод, ки дар баробари муваффақиятҳо як қатор камбудиҳо низ дар хобгоҳҳо ҷой доранд, аз қабили дар як қисм хобгоҳҳо ташкил накардани маҳфилҳои гуногун, нархи аз меъёр зиёди хўрок дар ошхонаҳо, ҳамкории суст бо ниҳодҳои қудратӣ, мавҷуд набудани воҳиди кории мураббӣ-омўзгор ва ғайраҳо.