Мурофиаи додгоҳии Тӯраҷонзодаҳо аз болои Саидмукаррам Абдулқодирзода, раиси Шӯрои уламо, имрӯз расо соати 10:00 дар толори Суди ноҳияи Исмоили Сомонӣ паси дарҳои боз сурат пазируфт.
Раисикунанда Зокир Аминов гуфт, мурофиа ба анҷоми худ наздик аст ва агар ҷонибҳо барои созишу мусолиҳа ақидае дошта бошанд, баён намоянд. Раиси Шӯрои уламои Тоҷикистон гуфт: «Мо бо аъзои Шӯро гуфтушунид гузаронидем, бекор кардани қарор имкон надорад». Бузургмеҳр Ёров, вакили дифои Тураҷонзодаҳо ба суд пешниҳод кард, то cудшаванда, яъне Саидмукаррам Абдулқодирзода дар асоси нишондоди моддаи 135, қисми 3 (ин модда маҳрумият аз озодиро ба мӯҳлати аз 3 то 5 сол пешбинӣ мекунад) муҷрим шинохта шуда, бар илова аз ӯ ҷарима ситонида шавад. «Ба хотири он, ки айбдоршаванда оиладор асту соҳиби фарзанд аст ӯро ба муҳлати 4 сол аз озодӣ маҳрум кунад. Бинобар он ки шахсияти судшаванда барои ҷамъият хавфнок аст барои фирор накарданаш аз толори суд ба ҳабс равона карда шавад»,-гуфт Бузургмеҳр Ёров. Ба қавли адвокат вақте ки вакили мудофеи Саидмукаррам вақти луқмапартоӣ баромад мекард, мантиқан гуфтан мумкин аст, ки тарафи айбдоркунии хусусӣ, яъне ҷониби Тураҷонзодаҳоро мегирифт. Вай гуфт, ки «мебахшетон моро қонун маън кардааст». Ҷаноби Ёров афзуд: «Бале, қонун дар ҳақиқат манъ кардааст, ки судшаванда гӯяд, ки ман бегуноҳам ва ҳимоягар баъракс изҳор намояд, ки ӯ гунаҳгор аст». Номбурда ҳамчунин илова кард, ки ҷониби ҷабрдида омодаанд, ки дар сурати рӯзи сешанбе ба ҷинояти содиркардааш иқрор намудани Саидмукаррам ба созиш ризо шуда ва ба пуррагӣ аз даъвои худ даст бикашанд.Зокир Аминов, раисикунандаи мурофиа то соати 10:00-и рӯзи сешанбеи 21-уми феврал танаффус эълом кард. Ёдрас менамоем, Шӯрои уламои Маркази исломии Тоҷикистон рӯзи 6-уми декабри соли 2011 дар баёнияе, ки онро хабаргузории «Ховар» ба нашр расонд, аз баргузории маросими азодории «Ошӯро» дар масҷиди «Муҳаммадия» ва нақши хонадони Тӯраҷонзодаҳо дар ин иқдомро шадидан интиқод кард ва ин хонадонро ба «тағйири мазҳаб" муттаҳам намуд. Сипас, оилаи Тӯраҷонзодаҳо барои тӯҳмат ва паст задани шаъну эътибори онҳо аз болои райиси Шӯрои уламо ба суди ноҳияи И.Сомонӣ шикоят бурданд.
Мӯҳр