Қатар дар Душанбе «Диёри Душанбе» месозад

Тендери байналмиллалӣ барои муайян намудани пудратчии кулли сохтмони шаҳраки «Диёри Душанбе» аз ҷониби ширкати «Қатари Диёр Реал Истейт Инвестмент-Тоҷикистон» эълон гардид.

---

Ин нуктаро Камол Ҳиҷозӣ, директори генералии ширкати мазкур  зимни мулоқоташ бо Давлаталӣ Саидов, раиси Кумитаи сармоягузорӣ ва идораи амволи давлатӣ иброз дошт. Тавре аз ин ниҳоди давлатӣ ба хабаргузории «Озодагон» иттилоъ доданд, шаҳраки замонавии «Диёри Душанбе» дар канори кӯли «Ҷавонон» сохта шуда, 68 ҳазор метри мураббаъро дарбар мегирад: «Ин шаҳрак аз 5 адад хонаҳои бисёрошёнаи истиқоматӣ, 3 адад   бизнес-марказҳо, 1 адад меҳмонхонаи панҷситорадор ва ғайра бинову марказҳои тиҷоратӣ ва дилхушиву варзишӣ, иборат хоҳад буд».

Зимни ин мулоқот Камол Ҳиҷозӣ корҳои амалишударо дар доираи татбиқи лоиҳаи «Диёри Душанбе” муаррифӣ намуда иброз дошт, ки айни замон замини барои сохтмон муайяншуда ҳамвор ва ба пуррагӣ барои корҳои сохтмонӣ омода карда шудааст, ки тибқи нақша дар моҳи апрели соли ҷорӣ сохтмони асосӣ оғоз хоҳад ёфт: «Ширкат тамоми масъалаҳои инфрасохториро аз қабили гузаронидани қубурҳои об ва хати барқу алоқаро ҳаллу фасл намуда, ҷиҳати ҷалби ширкатҳои ватанӣ дар сохтмони шаҳраки “Диёри Душанбе” бо 5 адад ширкатҳои ватанӣ шартномаҳои дахлдор ба имзо расонидааст».

Манбаъ ҳамчунин иттилоъ дод, ки дар марҳилаи аввали сохтмони асосӣ 3 иншоот аз қабили бинои бисёрошёнаи истиқоматӣ, бинои маркази соҳибкорӣ ва 1 адад бинои маркази тиҷоратӣ сохта ба истифода дода мешаванд. Лозим ба ёдоварист, созишнома ҷиҳати татбиқи лоиҳаи «Диёри Душанбе» 26 августи соли 2011-ум миёни ҷумҳурии Тоҷикистон ва давлати Қатар ба имзо расида буд.

Мӯҳр