Шӯрои машваратии Суғд аз мушкилоти зиёди бахши аграрӣ ёд кард

Имрӯз, 6-уми апрел дар толори Кохи матбуоти шаҳри Хуҷанд ҷаласаи дуюми Шӯрои машваратии назди раиси вилояти Суғд оид ба беҳтар намудани фазои сармоягузорӣ баргузор шуд.

Таъмини рушди соҳаи парвариш, коркард ва содироти меваю сабзавот дар меҳвари гуфтугуҳо қарор дошт. Мирзоанвар Ахмедов, масъули бахши кишоварзии ҳукумати  вилояти Суғд оид ба мушкилиҳои мавҷудаи соҳа, аз ҷумла нокифоя будани нуриву заҳрдоруҳо, тухмиҳои хушсифат, тартиби мураккаби пешниҳоди ҳисоботҳои оморӣ ва андозӣ, набудани яхдонҳои бузургҳаҷм, кам шудани имконияти нигоҳдории маҳсулоти тару тоза, саривақт омода нагаштани пойгоҳҳои обкашӣ ба мавсим, паст будани ҳосилнокии маҳсулоти кишоварзӣ, пастравии сатҳи механиконикунонии корҳои агротехникӣ ба ташкили мубориза зидди касалиҳою ҳашароти зараррасон, инчунин монеаҳои сунъӣ ҳангоми ба расмият даровардани фаъолият дар идораҳои дахлдор  гузориш дод.

Зимнан, Наим Асроров, ҳамоҳангсози ташкилоти байналхалқии «JIZ» аз набудани имтиёз ҷиҳати воридоти таҷҳизоти технологӣ барои соҳибкорони ватанӣ, кӯҳнаву фарсуда гаштани хатҳои технологии мавҷудаи коркарди меваву сабзавот, нокифоягии маблағҳо барои захира намудани ашёи хом, сатҳи баланди фоизи қарзи бонкӣ, ҷавобгӯ набудани лаёқату малакаи роҳбарони соҳа ба талаботи иқтисоди бозаргонӣ баён намуд.

Ҳамчунин дар бахши содироти маҳсулот пешниҳод шуд, ки барои баланд бардоштани савияи дониши соҳибкорон, роҳҳои ташкили реклама, иттилоъ ва қоидаҳои бозорҳои ҷаҳонӣ, ташкили комиссияҳои байнисоҳавӣ доир ба муайян намудани нархҳои мавсимӣ, тадбиқи равзанаи ягона барои гирифтани иҷозатномаи воридот ва содирот, ташкили марказҳои муттаҳидаи истифодаи техникаи хоҷагии қишлоқ ва ворид намудани технологияҳои замонавӣ, ҳамчунин фароҳам овардани шароити мусоиди фаъолият ва содироти маҳсулоти тайёр ба хориҷи кишвар ба соҳибкорон кӯмак расонида шавад.

 

Мӯҳр