Имрӯз, 3-юми май 9 намояндаи парлумони Аврупо вориди Душанбе шуд.
Муҳамадато Султонов, котиби матбуотии Маҷлиси намояндагон ба Озодагон иттилоъ дод, ки Паоло Бартолотси (Италия), Никол Килл-Ниелсен (Фаронса), Алфред Рубикс (Латвия), Герберт Дорфман (Италия), Марк Тарабелла (Белгия), Катарина Неведалова (Словакия), Кармен Ромеро Лопес (Испаниё), Инес Аяала Сендер (Испаниё) ва Николо Риналди (Италия) ҷиҳати ширкат дар ҷаласаи дуюми кумитаи ҳамкории парлумонии Маҷлиси намояндагони Маҷлиси олии Тоҷикистон ва парлумони Аврупо ба Тоҷикистон омадаанд. Дар доираи сафари кори ҳайати парлумонии Аврупо имрӯз бо роҳбари намояндагии Иттиҳоди Аврупо дар Тоҷикистон, сафир Эдуард Ауэр, вазири корҳои хориҷии Тоҷикистон Ҳамрохон Зарифӣ, намояндагони созмонҳои байналмилалӣ ва ниҳодҳои байналмилалии молиявӣ- Бонки ҷаҳонӣ, Хазинаи байналмилалии асъор, намояндагони ҷомеаи шаҳрвандӣ-ташкилотҳои ғайриҳукуматӣ ва доираи тиҷоратии Иттиҳоди Аврупо, намояндагони аҳзоби сиёсӣ мулоқот менамоянд.
«Фардо, 4-уми май ҳайати бонуфузи намояндагони парлумони Аврупо бо раиси Маҷлиси Миллӣ ва раиси Маҷлиси намояндагони Маҷлиси Олии Тоҷикистон мулоқот намуда, баъди нисфирӯз дар кори ҷаласаи дуюми Кумитаи ҳамкориҳои байнипарлумонии Тоҷикистону Иттиҳоди Аврупо иштирок менамоянд»,-афзуд манбаъ.
Рӯзи 5-уми май ҳайати парлумонии Аврупо дар кори семинар, ки дар Донишгоҳи миллии Тоҷикистон баргузор мегардад, иштирок намуда, ҳамон рӯз аз нерӯгоҳи «Норак» ва ноҳияи Ҳисор дидан менамояд.
Мӯҳр