Субҳи имрӯз, 17-уми май ҳайати парлумонии Тоҷикистон бо роҳбарии раиси Маҷлиси миллии Маҷлиси олии Тоҷикистон Маҳмадсаид Убайдуллоев дар қасри Таврическийии Санкт-Петербург дар ҷаласаи пленарии 37-уми Ассамблеяи байнипарлумонии кишварҳои узви ИДМ ширкат намуд.
Шавкат Саидов, ёвари раиси Маҷлиси миллии Тоҷикистон ба Озодагон гуфт, дар кори Ассамблея ҳайатҳои парлумонии Тоҷикистон, Арманистон, Белорус, Озорбойҷон, Қазоқистон, Қирғизистон, Молдова, Русия, Украина, инчунин Маҷлиси парлумонии Иттиҳоди Белорусия ва Русия, Суди иқтисодии ИДМ ва дигар созмонҳои байнипарламентию Конфедератсияи сартосарии Иттифоқҳои касаба иштирок намуданд.
Ассамблеяи байнипарлумонии кишварҳои Иттиҳоди давлатҳои мустақил дар ҷаласаи худ тибқи салоҳият ва рӯзномаи масъалаҳои баррасишаванда як идда қонунҳои моделӣ ва санадҳоеро, ки дорои характери тавсиявӣ дар таҳияи қонунҳои миллии кишварҳои аъзои ин созмони бонуфуз мебошад, ҷонибдорӣ ва кабул намуданд. «Дар Ассамблея барои дастгирии ҷавонон ва тарбияи сиёсатмадорони ояндаи кишварҳои аъзо иқдом гардид, ки Ассамблеяи байнипарлумонии ҷавонони ИДМ таъсис дода шавад»,-афзуд манбаъ.
Дар фарҷоми Ассамблея Маҳмадсаид Убайдуллоев дар қароргоҳи Маҷлиси Олии Тоҷикистон, воқеъ дар қасри Таврический бо намояндагони парлумони ҷавонони Тоҷикистон вохӯрӣ намуда, ҷиҳати фаъолияти ҷамъиятии минбаъдаи онҳо барои идомаву ташаккули анъанаҳои неки рушди демократии ҷомеа ва интститути парламентаризм барои наслҳои оянда ҳидояту маслиҳатҳо дод.
Мӯҳр