Дар толори маҷлисгоҳи Вазорати корҳои дохилӣ вохӯрии роҳбарияти вазорат бо варзишгарони Шӯрои ҷумҳуриявии «Динамо»-и ВКД Мавзуна Чориева, Парвиз Собиров ва Анвар Юсупов, ки ба Олимпиадаи тобистонаи Лондон-2012 роҳхат гирифтаанд, сурат гирифт.
Тавре ба Озодагон аз ВКД хабар доданд, зимни ин вохӯрӣ муовини вазири корҳои дохилӣ генерал-майори милитсия Ҷурахонов С.Қ. қайд кард, ки имрӯз бо фахр гуфта метавонанд, ки аз Шӯрои ҷумҳуриявии «Динамо»-и ВКД якчанд корманди онҳо ба Олимпиадаи тобистонаи Лондон-2012 роҳхат гирифтаанд.
Ҳар сол даҳҳо нафар варзишгарони Тоҷикистон дар мусобиқаҳои байналмилалӣ ширкат меварзанд ва соли 2011 онҳо соҳиби 307 медал аз ҷумла 92 тилло, 88 нуқра ва 127 медали биринҷӣ гаштаанд.
Баъдан дар ин мулоқот қайд карда шуд, ки роҳбарияти Вазорати корҳои дохилӣ ба соҳаи варзиш диққати хоса зоҳир намуда, кӯшиш менамояд, ки кормандони макомоти корҳои дохилӣ рӯҳан обутобёфта ва ҷисман боқувват бошанд. Бояд тазаккур дод, ки аксар варзишгароне, ки дар арсаи байналмилалӣ ба натиҷаҳои назаррас ноил гардидаанд, дастпарварони Шӯрои ҷумҳуриявии «Динамо»-и ВКД мебошанд.
Дар хотимаи вохӯрӣ бо Фармони Вазири корҳои дохилӣ генерал-лейтенанти милитсия Рамазон Раҳимов ба варзишгарони Шӯрои ҷумҳуриявии «Динамо»-и ВКД Мавзуна Чориева, Парвиз Собиров ва Анвар Юсупов «Сипоснома», рутбаҳои махсуси навбатӣ ва тӯҳфаҳои хотиравиро муовини вазири корҳои дохилӣ генерал-лейтенанти милитсия Шералӣ Сабзов супорид.
Бояд қайд кард, ки варзишгари дигари Шӯрои ҷумҳуриявии «Динамо» Алишер Гулов низ роҳҳат ба Олимпиадаи тобистонаи Лондон-2012-ро ба даст оварда, айни замон дар мусобиқаи байналмилалӣ дар Ҷумҳурии Корея қарор дорад. Ӯ низ ба «Сипоснома»-и вазири корҳои дохилӣ ва тӯҳфаҳои хотиравӣ сарфароз гардидааст.
Мӯҳр