38 роҳбари муассисаҳои таҳсилоти умумии пойтахт аз мансаб сабукдӯш гардиданд

Дар пайи амалиёти сатҳи касбӣ (аттестатсия)-и роҳбарони макотиби таҳсилоти умумии шаҳри Душанбе 20 роҳбари муассисаҳои таҳсилоти умумии пойтахт аз вазифаашон барканор гардиданд.

Гулнора Бобоева, сардори раёсати маорифи шаҳри Душанбе ба Озодагон гуфт, ки  зимни таъини директорони нави мактабҳо назару андешаи коллективҳои омӯзгорӣ, кумитаҳои падару модарон ва шӯъбаҳои маорифи ноҳияҳои пойтахт мавриди омӯзиш қарор гирифтанд.
Бино ба иттилои манбаъ, барои директори тозатаъини мактабҳои таҳсилоти умумии шаҳри Душанбе зимни таътили тобистона курсҳои такмили ихтисос гузаронида мешавад.
Манбаъ афзуд, ки то баргузории санҷиши зикршуда аз аввали сол барои додани номаҳои камол (аттестат)-и қалбакӣ, дар сатҳи зарурӣ иҷро накардани вазифаҳои худ, назардошти қонуншиканиҳои аз ҷониби толибилмони муассисаи таълимӣ содиршуда ва муҳлати дар сари мансаби директори мактаб  будани як шахс, дар маҷмӯъ 38 роҳбари муассисаҳои таҳсилоти умумии пойтахт аз мансаб сабукдӯш гардиданд.
Ёдовар мешавем, айни замон дар шаҳри Душанбе 140 мактаби таҳсилоти умумӣ фаъолият мекунанд.

Мӯҳр