Коршиносони КАИ СММ ҳавасмандии худро аз парвариши тухми картошка бо усули биотехнологӣ дар Тоҷикистон изҳор доштанд

Тоҷикистон дар ҷаласаи гурӯҳи корӣ оид ба стандартҳои кишоварзӣ, ки дар шаҳри Женеваи Швейтсария баргузор гардид, бори аввал ду лоиҳаеро барои баррасӣ пешниҳод намуд.

Тавре аз Агентии Тоҷикстандарт ба хабаргузории Озодагон иттилоъ доданд, нишасти мазкур бо ташаббуси Комиссияи аврупоии иқтисодии Созмони миллали муттаҳид (КАИ СММ) сурат пазируфт. Ҷониби Тоҷикистон лоиҳаҳои стандартҳои КАИ СММ оид ба хурмо ва биҳии тару тозаро барои баррасӣ пешниҳод намуд: «Пас аз муҳокимаи лоиҳаҳо бо тағйироту иловаҳо тибқи тартиботи амалкунанда барои баррасӣ ба давлатҳои аъзои СММ, ки дар ҷаласа ширкат надоштанд, равон мешавад ва дар ҷаласаи навбатии гурӯҳи корӣ бори дигар баррасӣ мегардад»,-афзуд манбаъ.
Сарчашмаи хабар афзуд, дар кори ҷаласа, ки тайи 3 рӯз идома ёфт, коршиносон, истеҳсолкунандагон ва содироткунандагони бокудрати меваю сабзавоти тару тоза аз Белгия, Олмон, Испания, Италия, Малайзия, Марокко, Мексика, Нидерландия, Лаҳистон, Шоҳигарии Муттаҳидаи Бритониёи Кабир ва Ирландияи Шимолӣ, ИМА, Туркия, Федератсияи Русия, Филиппин, Финляндия, Фаронса, Швейсария, Швейсия ва Африқои Ҷанубӣ иштирок намуда, ҷиҳати даровардани тағйироту иловаҳо ба стандартҳои амалкунандаи КАИ СММ оид ба меваю сабзавот фикру андешаҳои хешро иброз доштанд.
Гуфта мешавад, ширкати намояндагии Тоҷикистон ва лоиҳаҳои ба муҳокима гузошташуда аз ҷониби масъулини КАИ СММ ва иштирокчиёни ҷаласа аз мамолики дунё хеле хуб пазируфта ва ҷонибдорӣ шудааст. Дар нишаст котиботи гурӯҳи корӣ пешниҳод намудааст, ки якҷоя бо коршиносон ва истеҳсолкунандагони хурмо, тирамоҳи соли ҷорӣ дар Тоҷикистон маводи дастурӣ (бо аксҳои навъҳои мева) оид ба хуромои тару тоза таҳия шавад. Бо таваҷҷӯҳ ба  ин, масъулини гурӯҳи корӣ ҳавасмандии худро барои дар Тоҷикистон ҷорӣ намудани талаботҳои стандарти КАИ СММ оид ба картошкаи тухмӣ ва дастгирӣ дар парвариши тухми картошка бо усули биотехнологӣ изҳор намуданд. Масъулини Тоҷикстандарт мегӯянд, давом додани  ҳамкориҳо бо гурӯҳи кории КАИ СММ оид ба стандартҳои кишоварзӣ ба манфиати Тоҷикистон буда, аз ҷумла амалӣ намудани лоиҳаи ҳамкорӣ дар самти парвариши картошкаи тухмӣ барои иҷрои Барномаи давлатии рушди соҳаи картошкапарварӣ дар кишвар барои солҳои 2012-2016 мусоидат менамояд.


Мӯҳр